Horticulture Department  buatsaih Horti Fair 2017 chu vawiin chawhma khan  Assembly Annexe Building Conference Hall-ah Horticulture Minister Pu PC Lalthanliana’n a hawng.

 Pu PC Lalthanliana chuan tum mumal leh fumfe tak neia thawhrimna, taimakna leh rinawmna vawng reng chunga  hnathawh hi kan tum a ngai a ni, a ti a. Sawrkar lam atanga beisei nei ru reng chunga hnathawh hi kan bansan a hun tawh a ni, Horticulture Minister chuan a ti a. Ram kal  siam tur chuan lungthu pawimawh tak tak pathum  heng; Kohhran, NGO leh sawrkar te hi an awm a, tha taka thawk hovin Mizoram hi ram intodelh ah kan siam  thei a ni, a ti a. Horticulture Department hmalakna avangin hmasawnna tam tak hmuh theihin a awm a, thlai leh pangparte Mizoram mai bakah pawn lam thlenga thawnchhuah anih  tawh thu leh kuthnathawktu te zinga nuai tel lalut an awm te chu lawmawm a tih thu a sawi a. Pu PC Lalthanliana chuan kalkhawm te chu Horti Fair atanga inzir tur leh tangkai thei ang bera hmanga, chhawr  theuh turin duhsakna a hlan nghal a ni.

Horticulure Secretary Pu Lalhmingthanga IAS pawhin thu sawiin, Horti Fair chu thlai leh pangpar te duhzawng awlsam taka lei theihna leh nursery siam  te  tan pawha an thlai tiakte hralhchhuahna hmun a ni, a ti a. Kuthnathawktu te’n an harsatna te mithiamte nena sawi hona seminar neiin he fair hi an hlawkpui hle dawn a ni, a ti bawk.

Kum 2012 khan ‘Mega Sale’ tih hming chawiin Horticulture department te hian Fair an lo buatsaih tawh a. Zawngchhang tlak hle a hriain kum 2013 atang khan Horti Fair tia thlakin kumtin neih alo nita a ni. Tun thlenga Horti Fair atanga sum hmuhchhuah zat chu cheng nuai 104.44 vel a ni a. Kumin ah pawh awlsam taka lei theih turin thlai, thlai chi, pangpar leh thlai product Horticulture division hrang hrang ami te chu phochhuah a ni a. Horti Fair hi Mizoram Annexe Building Basement I & II ah May ni 23- 26 chhungin chhim theih a ni.

Horti Fair hawnna hun hi Horticultre Secretary Pu Lalhmingthanga’n a kaihruai a. Horti Fair 2017 theme , ‘Doubling Farmers’ Income’ sawi zauna Pu Rosanglura Ralte, Jt. Director of Horticulture (F) in a nei a. Horticultre Division tin atanga Best Horticulture Farmer 2017 leh  Best Horticulture Entrepreneur 2017  thlanchhuah te hnenah lawmman hlanna neih a ni a. Dr Elizabeth Saipari, Director of Horticulture in lawmthu sawina neiin he  hun hi a khar a ni.  

He hunah hian Pu R.Lalrinawma, Deputy Speaker; sawmbik department hrang hranga official te leh kuthnathawktu thahnem tak an tel a ni.