Vawiin chawhma khan Mizo Zirlai Pawl, Headquarters Lunglei bultumin Lunglei khawpui chhunga zirna in atanga HSLC leh HSSLC Exam-a zirlai naupang titha te chawimawina Saikuti Hall-ah buatsaih a ni a. School Education Parliamentary Secretary Pu Joseph Lalhimpuia chu Khuallian niin a hmanpui.

Pu Joseph Lalhimpuia chuan  zirlai hlawhtling te chu a lawmpui thu sawiin, an thawhrimna bakah an nu leh pa te tanpuina leh an zirtirtute inpekna rah a ni, a ti a. Vawiina kan hlawhtlinna hi a tawpna a nilo a, intlansiak bul kan tanna chauh a ni tih hre thar leh ang u, a ti. Zirlai naupang hlawhtlingte chu thlemna tam tak karah a tawp thleng thei turin theihtawp chhuah theuh turin a chah a ni.

Khuallian chuan Mizorama zirna ti hmasawn tura an hmalaknate tarlangin, Aizawl leh Lungleiah seat 50 ve ve B.Ed training-na hawn a nih thuai tur thu a sawi a. July thla atanga thla khat awh Spoken English Course graduate chin tan hawn a nih tur thu a sawi a ni. Zirlaite chungah beiseina sang tak an neih thu sawiin; nu leh pa, khawtlang, Mizoram leh Mizo hnam ti hmingtha tura hmasawn zel turin a chah a ni.

He lawmna programme hi MZP Headquarters Lunglei Vice-President Lalrammuanawma’n a kaihruai a, Secretary K. Lalremruata chuan report a pe a ni. Lunglei khawpui atanga zirna in atangin HSLC-ah zirlai 3 leh HSSLC-ah zirlai 1 te Top 10-ah an lang a. HSLC-ah Distinction–a pass zirlai naupang 94 leh HSSLC-ah Distinction-a pass zirlai naupang 27 an awm a ni. Heng bakah hian Top 10-a lang pha school-te hnenah lawmpuina hlan a ni.

HSLC-ah Vanlalvenpuia (5-na), Vanlalliani Pachuau (6-na) leh Jacob R. Lalmuanpuia (10-na) te Top 10-ah an lang a, HSSLC-ah K. Lalramdinzeli chu Vocational atangin 4-na a ni.