Vawiin chawhnu dar 1:00 khan School Education Minister Pu H. Rohluna’n MBSE Conference Hall, Chaltlang-ah Integrated Evaluation Scheme for Higher Secondary Stage a tlangzarh a. He inkhawmah hian Pu P. Lalchhuanga, IAS, Secretary, School Education Department chuan Mizo Language Committee leh MBSE tangkawp buatsaih ‘Mizo Tawng Ziah Dan’ tih lehkhabu a  tlangzarh bawk a ni.

Pu H. Rohluna chuan ‘Integrated Evaluation Scheme for Higher Secondary Stage’ tih lehkhabu (booklet) a tlangzarh a. He scheme hi zirna lama hmasawnna hmanraw pawimawh tak a ni tiin, nikum 2016-17 academic session atanga High School-a hman tan chu tun kum 2017-18 academic session atang hian Higher Secondary School-ah te hman anih tur thu a sawi a. High School level-a Integrated Evaluation Scheme hman mek chu zirlaiten an hlawkpuia, lehkha an zir tam phahin school attendance pawh a that phah hle a ni tih School Education Minister chuan kalkhawmte chu a hrilh a. Kum tawpa vawi khat exam hmang chauha teh nilova tehfung hrang hrang hmanga kum tluana teh an nih dawn tak avangin zirlaite leh zirtirtute chu kumtluana inthlahdah lova an tan mar a ngai dawn a ni a ti a. He scheme thiltumte hlen chhuak turin rinawm leh dik taka hmang theuh turin kalkhawmte chu a chah bawk a ni.  

He inkhawma khualzahawm Pu P. Lalchhuanga, IAS, Secretary, School Education Department chuan Mizo Language Committee leh MBSE tangkawp buatsaih ‘Mizo Tawng Ziah Dan’ tih lehkhabu a  tlangzarh a. Pu C. Chhuanvawra, Member Mizo Languange Committe chuan he lehkhabu thiltumte leh Mizo Language Committee-in an buatsaih dan chungchang kalkhawmte a hrilh a ni. He inkhawm hi Dr. Lalchungnunga, Chairman MBSE in a kaihruai a. Pu David Lallawmkima Fanai, Director (Academic) MBSE-in Integrated Evaluation Scheme (IES) for Higher Secondary School thiltum tlangpui leh kalpui dan tur kalkhawmte chu a hrilh a.  Pu F. Lianhmingthanga, Secretary, MBSE chuan lawmthu sawiin hun tawp a khar a ni.

Vawiin inkhawmah hian Higher Secondary School Lecturers Association of Mizoram (HISSLAM), Mizoram Secondary School Teachers' Association (MISSTA), Mizo Academy of Letters, Bible Society of India leh kohhran hrang hrang Literature Board aiawhte an tel a ni.

Integrated Evaluation Scheme hi Class XI leh Class XII te tan Academic Session thar 2017-18 atang hian hman tan a ni dawn a, exam, assignment leh test bakah attendance, General Studies, Work Experience leh Physical and Health Education ten mark an pu dawn a ni . Hemi scheme hnuaiah hian Theory section in mark 80 a pu anga, Internal Assessment in mark 20 a pu thung dawn a ni. Practical nei subject ah chuan Theory in mark 70 a pu anga, Practical in mark 10 leh Internal Assessment in mark 20 a pu thung ang.