Vawiin khan Dc Conference Hall, Keifangtlangah Champhai Bawrhsap Pu Vanlalngaihsaka kaihhruaina hnuaiah Sawrkar Official hrang hrang leh Champhaia NGO hrang hrang hruaitute chu Doctor dil avanga tun hnaia Champhaia thil thleng chungchang thlirlerna neih a ni.

Meeting kaihruaitu Pu Vanlalngaihsaka, IAS chuan tun hnaia Doctor ngiat vanga thil thleng chu pawi a tih thu sawiin, Doctor leh Nurse te chu mitin mamawh an nih thu a sawia. Dil pawh a thiang a, Sawrkar chu mipuite tan a nih angin mipuite pawhin kan mamawh thlen chu kan tihtur a nih thu tarlangin hetih rual hian Sawrkara thil ngiat dan thalo tak Sawrkar Bungraw tihchhiat ang zawnga chet hi thil tha a ni loa, Sawrkar Bungrua tihchhiat hian a tuartu ber chu mipui tho an nih thu a sawi a ni.

Khua leh tui tha ni tur chuan Sawrkar laka mahni chanvo (Rights) chauh niloin kan tihtur (Duties) te pawh hriat a ngaih tel thu a tarlanga. Tun hnu ah Sawrkar hnena thil dil leh dawn pawhin rilru fim tak pu chunga hma la tur leh Sawrkar Bungrua/in te hi Mipuite ta a ni tih hre renga a humhalhtua tang zawk turin zirlai leh mipuite chu mahni phaktawk zela fuih turin kalkhawm te chu a chah a ni. Hemi bakah hian Champhai a zirlai duhawm tak tak te chu Mizoram hmel ti mawitu leh ram tana mi tangkai lehzual ni turin All India Services lamah rilru senga a tam thei ang berin a All India Service Officer ni thei turin UPSC Exam te pawh ziak thin se a duhsak thu a sawi a. Champhai District mawina leh hmasawn zel na tur kawngah Sawrkar Officials, NGOs leh mipuite chu thawhpuiah a sawm bawk a ni.

Meeting ah hian NGO hrang hrang aiawh, NGO CoOrdination Committee, Champhai Joint Action Committee, MHIP, YMA leh VCP an tel a, khawtlang hruaitute te pawhin tun hnai thil thleng chu pawi an tih thu sawiin Sawrkar bungraw tihchhiat chungchangah thupha an chawi a tun hnu ah hetiang thil hi thleng tawhlo se an duh thu an tarlang a ni.