Vawiin khan DC Conference Hall Mamit-ah chhiatrupna thlen thulha chet lak dan hmeichhiate tan training buatsaih a ni a. He hun hi Pu Lalhmunsanga Hnamte, SDO (S) Mamit, Nodal Officer in kaihruaiin a hmanpui.
Thusawiin chhiatrupna lo thlen theih dan kawng hrang hrangte tarlangin hetiang lo thlen hunah hian mitinin kan tih tur leh mawhphurhna te kan hriat a tul a. National Level atanga Block Level thlenga kan in khai chhawn dante chipchiar takin kalkhawmte a hrilh a ni. Hemi zawh hian training hi tan nghalin session 2 ah then a ni a. Chawhma session-ah master trainer Pu B. Vanlalauva, Field Veng leh Tv. C. Lalthanmawia, Mizo Veng, Mamit ten training hi pe in chhiatrupna lo thlen palha chhanchhuaktua  tan huna thil tih tur chi hrang hrangte zingah hliamte buaipui hmasak tur a nih dan te  kalkhawmte a zirtir a ni. Chawhnu session-ah hian Pi Lalzikpuii, Community Health Officer, Mamit leh Pu P. Lalhmingthanga, OC Mamit PS ten first aid pek dante leh police tena an tih tur leh mawhphurhna te chipchiar takin kalkhawmte an zirtir bawk.

He training-ah hian Mamit khawpui chhunga MHIP leh YMA member thahnem tak an tel a ni.