Vawiin chawhnu khan chhiatrupna lo thlen thulha chetlak dan tur inzirtirna Aapda Mitra training chu CTI Sesawngah zawhfel a ni a. Kharna inkhawm buatsaihah Disaster Management and Rehabilitation (DM&R) Minister Pu C.Ngunlianchunga chu khuallian a ni.

Pu C.Ngunlianchunga chuan Mizo tlangval tlawmngai veng pakua atanga thlanchhuahten Disaster Management an training chhuak chu a lawmawm takzet a, khawtlang mipuite tan an thlamuanpui awm hle dawn a ni, a ti. Mizoramah leimin avangin chhiatna nasa tak a thleng thin a, tun hnai lawkah pawh fur a intan chauh laiin leimin avangin thihna rapthlak tak a thleng leh der tawh tih sawiin Minister chuan kan chunga thleng thei reng chhiatrupna lo hmachhawn dan tur leh mi mangang, tanpui ngaite leh chhanchhuah ngaite puih dan tur hi uluk taka zir a pawimawh hle a ni, a ti a. Mizo hnam nunphungin tlawmngaihna, tanpui ngaite tanpui hi a keng tel tlat a, chutihrual erawh chuan chhiatna pawhin hmanlai a ang tawh lova, concrete in lian pui chim karah chhanchhuahna hna thawh a tul thin avangin hetiang lama training chhuakte hi an hlu hle a ni, a ti a. An zir thiamnate thup bo mai lovin thenawm khawvengte zirtir leh chhawngtu, chhiatna a thlen pawh a midang aia thleng hmasa, midangte tan pawha rawn tlak leh innghahna tlak nih tum turin DM&R Minister chuan training chhuak te a chah a ni.

Aapda Mitra training of Community Volunteers ah hian Maubawk, Chite Veng, Sihphir, Sairang, Sairang Dinthar, Sihhmui, Tuirial, Saitual leh Sakawrdai atangin YMA Volunteers mi 59 an tel a. Training hian kar hnih awhin disaster management nihphung te, chhiatrupna tawrh theih te, hliam tuar bawisawm dan te, chhanchhuah hna thawh dan tur te, tuilian a awm thulha mamawh hmanraw siamchawp dan te leh tuitla chhar dante zirtir an ni.

Aapda Mitra Scheme hnuaiah hian India rama tuilian tuar thei zual nia ngaih State 25 atangin District 30 sawrkar laipuiin a thlang chhuak a, heng District tinah hian kum 2 chhungin mi 200 training tir tur niin an mamawh tul ang hmanrua te pawh pek tur an ni a. Thlanchhuah zingah hian Aizawl District a tel angin training batch hmasa ber hlawhtling taka kalpui a ni. Batch hnihna atan training hi neih leh thuai tum a ni bawk. Training chhuak mi pakhat zel hnenah hmanrua pek an nih bakah an khuate theuh mamawh leh chhawr tangkai theih tur bungrua pek an ni bawk.

Kharna inkhawm hi Aizawl DC Pi A.Muthamma in a kaihruai a, DM&R Director Pi Shashanka Ala in inlawmna thu sawiin Pu H.Dolianbuaia, Joint Director, DM&R chuan technical report a pe a. Training chhuak mi 59 te hnenah hian DM&R Minister Pu C.Ngunlianchunga hian Certificate, Award leh Equipment a sem a ni.