Vawiin hian Lawngtlai DC Conference Hall ah Chhiatna lo thlen palha a lo hmachhawn dan leh mawhphurhna hrang hrang neituten an mawhphurhnate an hlen theihna tura zirhona (One day Workshop on Incident Response System (IRS) and India Disaster Resource Network) neih a ni.

He zirhona hawnna inkhawmah hian District Disaster Management Authority; Lawngtlai District Chairman Pu J. Hmingthanmawia, Lawngtlai Bawrhsap ni bawk chuan thusawiin, Mizoram hi mithiamten lirnghing na tak thlen theihna hmun niin an sawi a, tin leimin, thlipui, ruahpui, rial, kangmei leh thil dang dang avangte pawn chhiatna hi tawk thei reng kan ni. Chhiatnate hi a lo thlen dan a zirin Village level a chinfel theih chi te an awm a, lian tham tak pawh a awm thei bawk. Hei vang hian kiltinah kan phak tawk theuhva kan inbuatsaih a ngai a ni. District Level-a inbuatsaihna tha a tangkai em em a, hei vang hian hian vawiinah Workshop nei tura kal khawmten uluk taka kan chanvote hriat chian kan tum theuh dawn nia tiin kalkhawmte a sawm a.

District Disaster Management Nodal Officer, Pu Vanlalchhuanliana, SDC in District Disaster Management Authority leh District Disaster Management Plan chungchang Report a pe a, tun dinhmunah Lawngtlai District ah hian Chhiatrupna thlen palha hman mai theih tur Hospital 3 leh PHC 5 ah khum 150, Sub Centre 36, Health Worker 76, Medical Store 9, Ambulance Bus 1 leh Sumo 4, Police Outpost 4, bakah JCB hman mai theih 2 leh hire theih 18 a awm mek a a ni.

Vawiinah Workshop ah hian Pu Zothansanga Hmar, District Organiser, Aizawl District chuan Chhiatna Hmachhawn Dan (Incident Response System) tithe, Department puala Plan lo siam dan (Departmental Disaster Management Plan) tih leh Indian Disaster Resource Network tih thupui hmangin kalkhawmte chu zirtirna a pe a, Pu V.L Zuithanga, District Organiser, Saiha District pawhin Chhiatna thlenna a chhanchhuah hna thawktute zinga mawhphurhna hrang hrang leh an hnathawh turte (Roles and Responsibilities of various IRS Position Holder) tih thupui hmangin kalkhawmte a zirtir bawk a ni.

He Workshop ah hian Incident Response System kalphungin a phut anga chanvo nei hrang hrangte an kalkhawm a, hriatbelh duh neite tan leh rawtna neite tan pawha sawi hona hun te hman nghal a ni bawk.