Vawiin khan ni hnih chhung awh tur National Vector Borne Diseases Control Programme (Malaria Control Programme) hnuaiah State Quarter Review Meeting chu Health Directorate Conference Hall-ah neih tan a ni.He review meeting hi Dr.C.Zarzoliana, Joint Director (Malaria) in a kaihruai a, Dr.Lalbiakzuala, Mission Director, NHM chu khual zahawm niin, Dr.Rohmingthanga Ralte, Director of Health Services chu khuallian a ni.

Khual zahawm Dr.Lalbiakzuala chuan thawktute pawimawhna leh an hna a rinawm taka thawh a tul thu uar takin a sawi a.

Khuallian, Dr.Rohmingthanga Ralte, Director of Health Services pawhin thu sawiin, kalkhawmte chu rinawm tak leh theihtawp chhuah tura a fuih bakah, mipuite hnena 'Tihdam aia inven a tha zawk' tih hre reng a thosi tui theihna tihbo te, thosilen zar that te leh DDT a kan chenna in kahtir thin a pawimawhzia te zirtir thin turin a chah.Mitin ten malaria chungchangah chauh ni lo natna dangah pawh mithiamte chauh rawn thin tura a duh thu sawiin, thiamna neilo rawn hmasa leh ring zawk tlat an awm chu pawi a tih thu a sawi bawk.

Dr.Lalremmawii, Deputy Director,(Malaria) chuan nikum 2014 chhunga Mizorama malaria dinhmun power point hmangin entirna a nei a. Kum 2014 chhung khan damlo thisen exam zat chu mi 256875 niin, malaria hrik pai (positive) mi 18513 an awm thu leh, chung zinga mi 16947 chu PF niin, mi 1566 chu PV an nih thu a tarlang a, kum 2014 chhung malaria vanga thi zat chu mi 31 an nih thu a tarlang bawk a ni.

He meeting ah District hrang hrang atangin thawktu an kal tha hle a, kum 2014 October - December leh kum 2015 January - March thla chhunga District hrang hrang dinhmun leh hnathawh dante zir hovin, hemi hun chhunga hnathawh dante thlirlet a ni ang a, hmalak zel dan tur te sawiho a ni bawk ang.