Khawzawl District Disaster Management Authority leh Disaster Management & Rehabilitation Department, Government of Mizoram tangkawp bultuma Khawzawl khawpui chhunga Zirna In hrang hrang aiawh Zirtirtute, Village Disaster Management Committee, NGO aiawh leh Sawrkar hnathawkte tana chhiatrupna thlen thulha chet lak dan tur leh hemi kaihhnawiha tul pawimawh hrang hrang inhrilhhriatna chu vawiin khan neih tan a ni. A ni khatna hi Zirtirtute puala buatsaih niin, Khawzawl District Bawrhsap Pu H. Lianzela chuan he hun hi khuallian ni a telpuiin training hi a hawng a ni.

He hun Khawzawl Zuchhip Branch YMA Hall-a neih hi Pu Paul L. Khuma, Chief Executive Officer, District Disaster Management Authority, Khawzawl leh Addl. DC ni bawk chuan a kaihruaia. Training-ah hian Directorate of DM&R atanga mithiam lo kal Pu Zothansanga Hmar, District Organizer leh Pi Zoenmawii, Disaster Management Coordinator-ten Zirtirtu 30 chuang kalkhawmte chu Powerpoint Presentation hmangin zirtirna an pe a. Vawiin Training-ah hian School Safety pawimawhna te, School Building leh a chhehvela hmun him tawklo zawn leh a tihziawm dan ngaihtuah te, chhiatrupna thleng thei pumpelh dan tur ruahmanna ‘Disaster Management Plan’ siam dan te, chhiatrupna a thlen thulha zirlaite an insaseng theih dan turte bakah hemi atana Mock Drill neih dan turte an zirtir a ni.

Ni 3 awh tur Disaster Training-cum-Capacity Building Programme hi vawiinah Zirtirtute tan buatsaih a nih hnuah naktukah Khawzawl khawpui chhunga NGO hruaitute leh VC te tan buatsaih a ni leh ang a, naktip Zirtawpniah Sawrkar Department hrang hrang hotute tan buatsaih a ni ve leh dawn a ni.