2946/2022-2023

Aizawl 5th December 2022: Vawiin khan Aizawl East-II huam chhung, Chhinga Veng Bethany-a Veng mipuite inkalpawhna leh bungraw phurh luh theihna tura motor kal theihna kawng siam hnathawh tanna hun hman niin Chhinga Veng Pastor PB Mankima’n Pathian hnena hlanna hun a nei.

Aizawl East-II bialtu MLA leh Minister ni bawk Pu Robert Romawi a Royte-in thusawiin contractor Lalmuanawma Sailo, Bethlehem Vengthlang chu Department hotute, khawtlang hruaitute leh Bethany Welfare Committee hruaituten lungrual takin a hna thawktu tur atan an ruat a. A hna tanna tur Electric Vengthlang leh Chhinga Veng inrina kawrah lei dawh hnathawh tan tur a ni a. He lei leh kawng atan hian Rs 140 lakhs chu Ministry of Tribal Affairs in Social Welfare Deptt kaltlangin a rawn sanction a, a bak SASCI sum Rs 50 lakh pawh he kawng thar atana hman tura ruahman a nih thu Pu Robert Romawia Royte chuan a sawi.

Minister chuan Chhinga Veng Bethany huam chhunga chhungkaw tam takin Veng mipuite tana inkalpawhna siam a nih theih nan an ram hlu tak tak phal taka an pek avangin lawmthu a sawi a, hnathawh tan nghal turah pawh Veng mipuite leh Bethany Welfare hruaitute pawhin hnathawktute lo tawiawm zel turin a ngen a ni. 

Bialtu Minister Pu Roberta chuan Kum 4 lek chhunga Aizawl East-II huamchhunga lei 2 dawh zawh a nih hnua hmun 3 danga dawh mek a ni chu bial mipuiten an tangkaipui hle a beisei thu a sawi bawk.

He inkhawm tawi hi Pu Lalzuitluanga, Chairman,  Bethany Welfare Committee-in kaihruaiin, Rev. P.B.Mankima, Chhinga Veng Pastor bialtuin hun serh a hmang a, Er. C.Lalthangvela, E.E, PWD Aizawl Road North-in hnathawh dan tur ruahmanna sawiin, khawtlang aiawhin Pu H.Ramzawnga, Chairman, Chhinga Veng Local Council-in lawmthusawiinhun a hmang a ni.