2111/2023-2024

Aizawl, 02.10.2023 : Chhinga Veng Branch YMA Kum 60 (Diamond Jubilee) tlin Lawmna inkhawm vawiina Chhinga Veng Community Hall-a buatsaih chu Pu Robert Romawia Royte, Sport Minister, Aizawl East-II Bialtu MLA ni bawk chuan khuallian niin a hmanpui.

Minister Pu Robert Romawia Royte chuan kalkhawmte Jubilee chabai bukin, Chhinga Veng Branch YMA-in kum 60 chhunga tanpui ngaite tanpuia, thil tha a tih zawng zawngte chhuanawm a tih thu a sawi a. Hruaitu hmasa, sul lo sutu zawng zawng te leh tuna hruaitu ni mekte chu an veng tana an thawhrimna leh inpekna avangin zahna leh chawimawina hlan thar in, Aizawl East-II-a kum nga chhunga bial tana hnathawh tlangpuite leh hna kal mek leh hmachhawpte a sawi bawk a. Minister chuan a bial pumpui tana State budget pawn lam atangin cheng nuai sing thum chuang man hu hnathawh mek, thawh zawh tawh leh thawh zui tur sanction tihfel a ni tawh thu a sawi.

Mizoram sawrkar chu CAB duhlotu leh India rama CAB duhlohna cabinet resolution pass hmasaber a nih thu sawiin, sorkar, Kohhran leh Joint NGO ten Mizoram huamtirlo tura an duh angin Mizoram huam lo tura CAB tihdanglam (revised CAB) chu Mizoram a huam loh nana pawimawh a nih avangin sorkarin a thlawp tak thu te, Uniform Civil Code (UCC)-in Mizoram a huam loh nan Assembly-ah Resolution siam a nih tawh thu leh kan ram thenawma kan chipui Zohnahthlakte harsatna tawh kawnga YMA, sorkar leh Mizo mipuite tanrualna lawmawm a tih thu te a sawi a ni.

Khuallian Pu Robert Romawia Royte chuan Jubilee Lungphun hawngin Jubilee Dar vuak hma a hruai a, Jubilee pual Exhibition tlawh zuiin nilengin Jubilee lawmna programme hman a ni. Chhinga Veng Branch YMA Diamond Jubilee denchhenin Chhinga Venga NGOs te leh Sports Clubs te tanpuina a pe bawk.

Khualzahawm, Central YMA President Pu R.Lalngheta pawhin kalkhawmte Central YMA hmingin Jubilee chibai a buk a. YMA chuan tanpui ngaite a tanpui chhung chuan YMA hi a tluk a rin loh thu a sawi a, Kohhran leh YMA chu inkawp tlat, kal hrang thei a ni lo a ti. Ruihhlo bawiha tangte chhanchhuaha ruihhlo do, sex diklo taka hman dodal te, fa neih tam, pian pun, hnam dang nupui pasala neih loh, kan hnampui ram danga awmte tanpuina kawngah theih tawpa tanlaa kan ram leh hnam humhalh kawngah tan la sauh sauh turin Zofate uar takin a sawm a ni.

Chhinga Veng Branch YMA hian an Diamond Jubilee lawmna pual hian Inter Branch YMA Basketball Tournament an buatsaih a, Home pahnih - Tawngtai Bethel Camping Centre leh Operation Kindom Ministry-ah Vawk pum pakhat ve ve an pe a. Tuitla buaipuinaa hmahruaitu leh hah zual YMA Branch pathum - Sairang Branch YMA, Sairang Dinthar Branch YMA leh Sihhmui Branch YMA te hnenah Rs 10,000 theuh an pe bawk a ni. Heng bakah hian damlo mamawhtute hman turin Aizawl Civil Hospital-ah YMA member mipa 48 leh hmeichhia 2 ten thisen unit 50 an pe bawk. Chhinga Veng Branch YMA-ah hian member mipa 1894 leh hmeichhia 981, an vaiin 2875 an awm mek a, heng zingah hian Life Member 44 an awm mek a, an Branch atangin Central YMA Office Bearer lo ni tawh mi pali an awm tawh a ni.

He Diamond Jubilee lawmna inkhawm hi Pu P.C.Thangthuama, President, Chhinga Veng Branch YMA-in kaihruaiin bialtu Pastor Rev P.B.Mankima’n hunserh a hmang a, member thite sunna hun hmangin, hruaitu hluite chawimawina hun an hman bakah item hrang hrang neiin hun hlimawm tak an hmang a, tlaiah khawtlang huapin Jubilee ruai an theh a ni. Zan lamah Jubilee kharna hun Community Hall-ah an hmang dawn a ni.