2112/2023-2024

Aizawl 2nd October, 2023 : Pu Lalruatkima, RD Minister chuan vawiin khan Dinthar Branch, Aizawl MUP Building (Basement Floor) Dinthar YMA Ram Ebenezer Hospital Road a mi chu khuallian niin a hawng a, Dinthar YMA Hall ah a lawmna program hman a ni.

Khuallian chuan Kan Ram statistics enin Mizo mipate kan tan a ngai a, nakin lawkah kan hnam hi a ral mai ang tih a hlauhawm a, fa neih tam kan inzirtir that leh a ngai a, chu chu kan hnam damna tur a ni a ti. Sumdawng lian company te pawhin mihring tamna apiangah investment an ti thin a, chuvangin MUP member-te'n kan tu leh fate fa neih tam pawimawhzia kawhhmuhtu ni theuh turin a chah. Midangin an neih loh MUP kan ram leh hnamin kan nei hi a ropui hle a, kan hnam  tungdingtu tangkai tak a nih angin kan zahin an ni-ah hian chibai bukin duhsakna a hlan a. Upate chawimawi a, zahna lantir thin hnam kan nih angin kan hnam a dam theih nan kan tu leh fate-ah Mizo tlawmngaihna, rinawmna, taihmakna, huaisenna leh thian chhan thih ngam kan nihna kan vawnnun zel theih nan uar taka zirtir fo turin a chah bawk a ni.

Pu P. Kaphranga, Treasurer, MUP Dinthar Branch atangin Report ngaihthlak a ni a. MUP building sak nan hian I&PR Minister Pu Lalruatkima, an bialtu MLA chuan MLA Fund Cheng 13,50,000/- a pek bakah mi thahnemngai te thawhkhawm nen a zavaiin Cheng 21,40,000/- senga sak a ni a. Building zau zawng hi feet 31 bial a ni.

He hunah hian Pu R. Thanglura, Dy. Major, AMC bakah Local Council, YMA leh MHIP Dinthar Branch atangin thusawi tawi ngaihthlak a ni bawk.

MUP Dinthar Branch Aizawl hi March Ni 10,1978-ah din tan niin MUP bial then 14 a awm mek a. Tun dinhmunah hian Member hmeichhia 305 leh mipa 202,an vaiin Member 507 an awm mek a ni. Nimin October ni 1 kha khawvel pum huap Upate ni a ni a, chawlhni a nih avangin vawiin hian hman a ni. MUP Motto chu 'Mite tana malsawmna nih' a ni.

MUP Building hawnna leh lawmna programme hi Pu C. Lalhuala, President-in kaihruaiin Upa Ramhmangaiha Ralte, Senior Adviser chuan hunserh a hmang a Pu Z.D. Zamawia, Secretary chuan lawmthu sawiin hun a khar a ni.