2113/2023-2024

Vawiin khan School Education Minister Pu Lalchhandama Ralte chuan Darlawn leh East Phailengah school building sak thar 3 - Govt. East Phaileng Primary School II building,  Samagra Shiksha Higher Secondary School Arts stream E. Phaileng building sak thar leh Samagra Shiksha Higher Secondary School (Science Stream) Darlawn building sak tharte a hawng.

Samagra Shiksha Higher Secondary School Darlawn Science Stream building hawnna puala inkhawmah thusawiin Pu Lalchhandama Ralte chuan thim ata enga hruai chhuak turin Pathian thu tih lohah chuan zirna a pawimawh ber a, technical lama hna țha leh sang thawk turin Science thiam a ngai a, Darlawnah he subject zirna a lo awm ta hi a lawmawm hle a ni a ti. Minister chuan Mizoram sorkarin sikul 180 zet sorkar sikulah a hlangkai a, Adhoc Aided leh Lumpsum a dah tharte nen sikul 300 zet dinhmun țhaah an ding ta a, sorkar hian kum 2021-ah he hmasawnna hi thlen a tum tawh a, hripui avangin a khawtlai ta mai zawk a, politics-a hamțhatna atana hman tum vang a ni lo a ti.

Minister chuan Mizoram sorkarin Mizo țawng tihhmasawn, humhalh leh tihzahawm zel a tum a. MPSC-in hna a lakah Mizo țawng an thiam leh thiam loh en nan Mizo țawng middle school standard exam buatsaih a ni tawh dawn a ni a ti bawk. Hna țha leh sang thawk thei chhertu khawl zirna țha he tlangdungah hian dah a ni ta a, zirlaite chu ruihhlo laka buai mai lovin tum neia kal tur leh Pathian țih leh malsawm tlaka zir turin a chah.

Darlawn HSS Science building hawnnaah hian Pu Lalhmachhuana, SPD Samagra Shiksha & Addl Director pawhin thusawiin, ram hmasawn zel nan Sorkar laipuiin Science stream a ngaih pawimawh dan leh hmasawnna hnuk a nih dan te a sawi a ni.

Minister-in vawiina a hawn tak Govt East Phaileng Primary School II hi NABARD sum ațanga sak a ni a, Higher Secondary School building pahnih te hi Samagra Shiksha sum ațanga sak a ni.

Vawiina Darlawn HSS Science stream hawnnaah hian Minister hi Pu Lalhmachhuana, Addl. Director & SPD Samagra Shiksha in a țawiawm a, Darlawn khawtlang hruaitute, zirlai leh zirtirtute an tel a ni.