2114/2023-2024

Dated Serchhip, the 2nd October, 2023: Vawiin khan Er. Lalrinawma, Minister SW&TA etc chuan PMAAGY Scheme hmanga sak Government Middle School Ngentiang building thar a hawng.

School building hawnna inkhawm tawiah Minister chuan thusawiin hringnun bulthut hi zirna anih angin zirna in thar tha tak khawtlang hruaitute leh mipuite inpekna zarah an nei thei chu a lawmpui thu a sawi a; a enkawl zui zelnaah pawh thawhhona tha tak nen mipuite chu mawhphurna sang tak an nei a ni, a ti. Mahni kawtkaia zirna in te chu ngaihven zui zela, hmabak hlenna kawnga zirtirtute leh zirlaite pawh a theih chinah inpuitawn zel turin a sawm a ni. Pu Rinawma chuan a bial chhung enkawlnaah eizawnna, zirna leh hriselna chu a ngaih pawimawh zual a nih reng thu sawiin, mahni khaw chhung hmasawnna hnathawh leh sawrkar hmalakna te thlawp zel turin a sawm a ni.

Government Middle School building thar PMAAGY Scheme atanga sak hi Village Council hruaitute enkawlna hnuaiah cheng nuai 20.23 senga sak niin, Pu Lalremmawia, Headmaster i/c chuan building thar tha tak an nei chu lawmawm a tih thu a sawi a. Pu Lalrinenga, Headmaster pension in kalkhawmte lawmna leh School din chhoh dan sawiin, district huap inelna ah pawh lawmman an lak thin chu mipuite nen kan thawh hona rah a ni tiin hun kal zel turah pawh lawmman dawng thei tur khawpa school enkawl turin duhsakna a hlan a. He hun hi Pu Felix Vanlalfela'n kaihruaiin a ni.