2115/2023-2024

Champhai the 2nd October, 2023 - Vawiin khan Transport, EF&CC etc Minister Pu TJ Lalnuntluanga chuan District Horticulture Office, Champhai leh SASCI 2020-21 sum cheng nuai 103 senga ruahman Turmeric Processing Unit, Tlangsam te a hawng a ni.

Hawnna inkhawm Pu CH Lalmuanpuia, MHS, Horticulture Director kaihhruaiah Pu TJ Lalnuntluanga chuan District Horticulture Office, Champhai leh Turmeric Processing Unit, Tlangsam ruahman thar te chu Champhai District mipuite, a bik takin kuthnathawktute tana hmasawnna duhawm leh mellung pawimawh tak anih thu sawiin, Mizoram ina ei leh bar kan intodelh theihna tura hmalakna kal mekah ruhrel pawimawh tak ala ni zel dawn a ni, a ti a. Turmeric processing unit-te, Tlangsam Winery-te leh tun dinhmuna ruahman tum mek Passion Fruit processing unit-te chu kuthnathawktuten eizawnna ngelnghet zawk an neih theihna tur leh an tharchhuah-te anmahni ngei ina sawngbawla, an hlawk zawkna tura Sawrkarin ruahmanna a siam a ni, a ti a.

Khawvel changkang chho zelah kan ramngaw leh nungchate humhalh chunga hma kan lak zel a tul a ni tiin, kum tina lo kan neih kan bansan tial tial a, huan nghet kan uar chhoh zel a tul a, hei hi Sawrkar Policy pawimawh tak a ni, a ti a. Heng thiltumte ti hlawhtling tur hian Department hrang hrangte inkarah thawhhona tha leh hmalak tlan thiam a tul takzet a ni tiin, kan ram economy hmasawn zelna turin Official kalkhawmte pawh ngaihtuahna zau tak nei turin a chah a ni.

Horticulture Department tha ti chak tur leh an inrelbawl dan tha zawka kalpui turin Chief Minister Pu Zoramthanga kaihhruaiin Department restructuring hna pawimawh tak buaipui niin, Champhai District pawhin District Horticulture Office a nei ve thei ta ani tiin, he hmalakna avang hian Chief Minister leh Department thawktute chungah lawmthu a sawi a. District Horticulture Office, Champhai chu kuthnathawktute hmunpui ber leh an mamawh tinreng an thlen ngamna lo ni zel tura chahin an office leh hmunhmate cheibawl that kawngah pawh Sawrkarin hmalak pui zel a tum thu a sawi a. Kuthnathawktute pawh Horticulture Department ah an mamawh apiang thlen vat thin tur leh mithiamte thurawn ngai pawimawh thin turin a chah a ni.

He huna khualzahawm Champhai District Bawrhsap Pu James Lalrinchhana pawhin thu sawiin, District Horticulture Office, Champhai leh Turmeric Processing Unit, Tlangsam te chu Champhai District tana hmasawnna tam tak thlentu leh District economy chawikang zel tu an nih ngei a beisei thu a sawi a. Champhai District hmuna hrang hrangah hmasawnna tam tak awm mek zelin Tlangsam ngeiah pawh Swadesh Darsahn 2.0 kaltlangin Tourism hmalakna liantham tak la ruahman tur anih thu sawiin heng hmasawnna te lo hmang tangkai turin mipuite pawh an rilru lo siam lawka, lo inpuahchah lawk turin a ngen a. Turmeric Processing Unit, Tlangsam a khawl bun hrang hrang te pawh neitu rilru pu a, uluk leh fimkhur taka lo enkawl zui tur leh an mamawhte Department mithiamte hnena thlen thuai thin turin a chah a ni.

Pu Lalengzama, Chairman, Turmeric Growers Society Tlangsam pawhin thu sawiin an society hmalakna leh chanchin tlangpui a sawi a. Turmeric Growers Society Tlangsam hi kum 2004 ah din niin khawl engemawzat an in bun chhova, amaherawhchu loan lak rulh theihloh avang leh rokhawlhna hrang hrang avangin hma an sawn thei lova. Bialtu MLA Pu TJ Lalnutluanga hnenah an harsatna te thlenin, aniin Horticulture Department kaltlanga he Processing Unit hi changtlung taka an ruahman that sak leh avangin Minister chungah hian Society aiawhin lawmthu a sawi a ni.

Vawiin program-ah hian Horticulture Department thawktute, Champhai Head of Office-te, Turmeric Growers Society Tlangsam member-te leh sawm bik dangte an tel a. Rec Lalchungnunga Hauhnar chuan hunserh hmangin Pu T. Vanlaltlana, Jt Director, Horticulture chuan lawmthu sawina hun a hmang a ni.

Turmeric Processing Unit, Tlangsam hi SASCI 2020-21 sum cheng nuai 103 senga ruahman niin Civil works bik atan cheng nuai 52.58 ruahman a ni a, June ni 19, 2023 ah hna thawh tan a ni a. Land development, fencing, main gate, internal road, drainage, factory building, office furniture, computer leh printer te ruahman a ni a. A bak zawng hi khawl mamawh leina atana hman niin, Washing unit, Slicing unit, solar drying unit, grinding machine, packing machine, transformer leh electric distribution system te lei a ni a. Tin, khawl in chak taka hna a thawh theihnan kawlphetha 24x7 mamawh ruahman a ni bawk a.

Washer/ Aieng silna khawl hian vawi khatah 200-300 kgs a silfai theih a.

Slicer/ Zailepna hian darkar khat chhungin kg 300 a zailep thei a

Pulvizer/Aieng her dipa hian darkar khat chhungin kg 100-140 a herchhuak theih a.

Packing machine hian darkar khat chhungin 1200-1800 packet a pack theih a ni.

District Horticulture Office, Champhai hnuaiah hian Block Horticulture Office pahnih – Champhai leh Samthang a awm a ni.