Vawiin chawhma khan St.Peter’s Higher Secondary School auditorium, Chhingchhipah Mizoram sorkara Labour Employment & Industrial Training Department hnuaia Labour Welfare Fund semna inkhawm neih a ni a, Parliamentary Secretary, Pu Lal Thanzara’n a hmanpui.

Pu Lal Thanzara chuan Mizoram sorkarin mi retheite leh rahbi tleu tawhte dawm kan hi a tum ber a nih avangin NLUP pawh chak taka hmalak zel a nih thu a sawia. “Nitina inhlawhfate tana hamthatna leh thil chhenfakawm tak tak sorkar laipuiin a duan chhuahte pawh Mizoram sorkar chuan chak taka bawhzuiin, chung chu vawiinah hian Chhingchhip leh a chhehvel khua amiten a zar an zo ve tan ta a ni,” a ti. “Thalaite khawvel siam tur leh infiammite tuihalna hrerengin, an theihna leh thiamna haichhuak tur pawhin Zoram hmun tam takah infiamna hmunhma leh changtlung zawk buatsaih chho mek a ni bawk,” Pu LalThanzara chuan a ti.

He huna sum semchhuahte hi he scheme hnuaia inziaklut, member fate zirna chhawmdawlna atana tih a ni a, Chingchhip leh a chhehvel khaw 16 atangin mi 922 te hnenah Rs. 32,24,000/- semral a ni. H

e inkhawm hi Assistant Welfare Commissioner, Pu Francis Lianmawia’n a kaihruaia, report pein he scheme hnuaia memberte hamthatna dawn theih hrang hrangte a sawi bawk. Mizoram Labour’s Union President, Pu Johnson Hauhnar bakah FOMTU General Secretary, Pu Lalrinpuia Ralte ten thu an sawia, Pu Lianzuala, Mediator, Chhingchhip chuan lawmthu sawiin hun hnung a khar a ni.