Vawiin khan Higher &Technical Education Minister Pu Lalsawta chuan Mizoram English Literary Society (MIELS) buatsaih college hrang hrang te poetry inziahsiak lawmman semna inkhawm, Govt. Hrangbana College Tawngtaina In-a neih chu a hmanpui.

Pu Lalsawta chuan Mizo mipui te hi kawng hrang hranga buai inti tak tak, buaipui zawng erawh inanglo tak tak kan ni a, saptawng thu leh hla phuah lama hmasawnna kawng sial turin mi thahnemngai ten MIELS an din chu lawmawm a ti a, college zirlai te hmakhaw ngaia poetry inphuah siak an buatsaih chu an fakawm hle a ni, a ti. Education hi zirlai bu a intan leh tawp a ni lova, zirlaibu piah lamah hian thil tam tak zir tur a awm tih sawiin Education chu kawng engkimah kan thlen chi atanga hmasawn zel hi a ni, a ti. Sorkar chuan Mizoram zirna hmasawn zelna tur hmathlir thui tak a nei a, chu hmathlir tipuitling tur chuan bul an tan chho mek tiin Pu Lalsawta chuan sawiselna tam tak tawk thin mahse heng te hi an hmalakna tithuanawptu ni lovin khalh ngiltu a ni zawk a ti a. Chhawr tlak leh hman tlak thiamna pawchhuak ngei tura zirlaite chahin Higher & Technical Education Minister chuan poetry inphuah siaka lawmman latute zawng zawng a lawmpui thu a sawi bawk.

MIELS buatsaih Mizoram Inter College Poetry Writing Competition ah hian Aizawl khawpui chhung leh pawn college 11 atangin zirlai 40 an tel a. Hrangbana College zirlai Lalruatfela chuan lawmman pakhatna la in trophy, certificate leh sumfai cheng 10,000 a dawng a; lawmman pahnihna latu Grace Ch Ralte, Hrangbana College zirlai chuan trophy, certificate leh cheng 7000 a dawng a; pathumna chu Pachhunga University College zirlai Zothankimi Zote niin cheng 5000, certificate leh trophy a dawng a ni. Heng bakah hian consolation prize mi 11 hnenah sem niin a tel zawng zawng hnenah participation prize pek an ni bawk. Endiktute hi Kristina Z Zama, C Lalawmpuia Vanchiau leh Lalbiaksangi Chawngthu te an ni.

Higher and Technical Education Director Dr LN Tluangi’n Minister Pu Lalsawta hi a tawiawm a ni.