P&E Department-in an Department hnathawh leh hmalak mek te, ni li chhunga thlirhona an neih ‘Review Meeting’ tawpni chu nimin tlai khan Pu Lal Thanzara, Parliamentary Secretary to Chief Minister-in Aijal Club-ah a hmanpui. He meeting-ah hian tunhnaia Sawrkar Laipuiin ram pumah a vawikhatna atana Viability Gap Funding (VGF) kaltlanga kawlphetha siamchhuahna (power project) remtihna a pek leh a rawn sanctioned Mega Watt 210 pe chhuak thei tur Tuivai Hydel Project chungchang inhrilhhriatna neih a ni bawk.
Pu Lal Thanzara chuan Tuvai Hydel Project Sawrkar Laipuiin a rawn approved tak hi harsatna hrang hrang paltlanga Mizoram Sawrkar in a sualchhuah anih thusawiin Pathian malsawmna kan dawng a ni, a ti. He Project a puitlin hunah chuan kawlphetha lamah kan intodelh piah lamah power tam tham tak hralh tur kan nei dawn a, hei hian hun lo kal zel turah Mizoram economy chu nasa takin a pui thei dawn a ni a ti. Tunlai power dinhmun chungchang sawiin Pu Lal Thanzara chuan kan thenawm state thenkhat mahni a power project nei te pawhin load-shedding an nei nasa a, an ni aia chuan Mizoram chu load-shedding lamah kan ziaawm a ni, a ti. Enginner kalkhawmte chu thahnemngai taka ram leh mipui tana thawk chhunzawm zelturin a chah a ni.
He programme hi Pu L. Pachuau, Chief Engineer (Distribution) chuan a kaihruai a, Engineer-in-Chief Pu C. L. Thangliana chuan Tuivai Hydel Project atana hma an lak dan hrang hrang te, he Project kalhmang dan tur te a sawi. P&E Department hmalakna hrang hrang te pawh a tarlang bawk a ni.
P&E Department hian RGGVY hnuaia khaw 137-a hnathawh turah 94 an zo tawh a, hemi zinga 34 chu hawn thei tep a ni tawh a, Sawkawrdai, Phullen leh khaw dang pahniha Substation sak mek chu an peihfel thawhkhat tawh bawk. Consumer ten kawlphetha an hman zat te, felfai zawka kawlpetha pekchhuah dan leh hengte chhinchhiah dante leh power ruk danna atana Consumer Indexing an kalpui mek chu November thlaah zawhfel an beisei thu PHE hotute hian an sawi. Consumer Indexing zawhfel hnu hi chuan consumer ten current an pawh dan chu GIS hmanga chhinchhiah vek a nih dawn avangin current pawh ruk theilo tura ngaih a ni.
Tuivai Hydel Project hi MW 210 pe chhuak thei tura ruahhman a ni a, a satu tur chu Private Company a ni dawn a, global tender hmanga thlan tur an ni dawn a ni. Kum 5 chhunga sak zawh tura beisei an ni dawn a, an power siamchhuah zawng zawng chu unit khat Rs. 3.55 zelin kum 35 chung Mizoram Sawrkar hnenah an hralh ang.
