Serchhip Bawrhsap Pu H.Darzika hovin Serchhip District Election Official ten vawiin chawhnu khan Serchhip DC Office Chamber ah karleh nilaini (April 13th, 2011) a Chhingchhip VC by-election neih tur chungchanga ruahmanna leh inpuahchahna te an thlirho a, he hun hi State Election Commission Secretary Pu P.Lianhrima leh Under Secretary Pu H.Lianzela te pawhin an hmanpui a ni.

Vawiina thukhawm chuan inthlanna muanawm, thianghlim leh felfai tak neih anih theihna atana tih tur pawimawh tak tak te an sawi hova, venhimna pawh uluk taka kenkawh tur niin dan bawhchhiate chu dim an nih dawn loh thu an sawi a, April ni 10, 2011 (Pathianni) atanga tanin inthlan leh a kaihhnawihte tih zawh fel anih hma chuan Chhingchhip Mualpui VC Area huam chhung chu dry zone a puan anih tur thu an rel bawk a, mipuite chu India danpuiin a phut leh beisei ang taka an tih tur pualte tha taka ti tura an beisei thu sawiin, inthlan leh a vuakvet a harsatna hrang hrang awmthei  lo hmachhawn dan turte an sawi ho nghal bawk.

Chhingchhip Mualpui VC hi Tuikum MLA Constituency hnuaia awm niin electoral roll thar berah chuan voters 1100 (mipa 541, hmeichhia 559) an awm a, chhungkaw 289 an awm bawk a ni. Tun VC by-election ah hian VC seat ruak 4 hnawhkhah tur a ni a, April ni 13, 2011 (nilaini) zing dar 7 atanga tlai dar 4 thleng Government Chhingchhip Primary School-III ah vote thlak theih a ni ang a, vote thlak zawh veleh Chhingpuii Hall-ah vote chhiar nghal a ni ang. He election atan hian State Election Commission-in a pawm candidate pariat an awm a, chungte chu :

1)      K.Biakzinga          -              INC

2)      R.Lalnunmawia  -              INC

3)      Lalremthanga     -              INC

4)      F.Zakhuma           -              INC

5)      P.Zathuama         -              IND

6)      J.Rothuama         -              IND

7)      Lalfakzuala           -              IND

8)      C.Lianhlira            -              IND

·         INC = Indian National Congress, IND= Independent te an ni.