April ni 13, 2011 (Nilaini) a Chhingchhip Mualpui Village Council Bye-Election neih tur chungchanga ruahmanna te leh inpuahchahnate a hmun a enchiang turin State Election Commission Secretary Pu P.Lianhrima chuan vawiin chawhma khan Chhingchhip a tlawh a, SEC Secretary hi Pu H.Lianzela, Under Secretary, State Election Commission-in tawiawmin Chhingchhip-ah hian Serchhip Bawrhsap Pu H.Darzika leh Sawrkar mipawimawh ten an lo dawngsawng a ni.
State Election Commission Secretary chuan vote thlakna tur hmun leh a chhiarna tur atana hmun ruahmante a tlawh hnu in Chhingpuii Hall, Chhingchhip-ah political party hrang hrang aiawhte, tlawmngai pawl hrang hrang aiawhte, VC aiawhte leh Candidate te, Polling Officials te leh Returning Officer te kokhawmin State Election Commission-in VC by-election atana ruahmanna a siamte a sawi fiah a, hriatfiah loh lai te leh hriatchian ngaite pawh sawiho a, inhrilhfiah nghal a ni bawk.
Thusawitu dang Pu H.Darzika, Serchhip District bawrhsap pawhin inthlanna muanawm leh felfai neih a tul thu sawiin, thianghlim taka inthlanna hlawhtling taka kalpui turin mipui kalkhawmte chu a chah a, khawtlang thatna tur ngaipawimawh tura chahin VC area mipuite chu kum tam tak lo khawsa ho tawh an nih avangin inngeih tlang dial diala awm turin a chah bawk a ni.
Mualpui VC by-election hi April ni 13, 2011 ah neih ani ang a, Government Chhingchhip Primary School -III ah vote thlak niin Chhingpuii Hall-ah vote tla chhiar a ni ang.
