2334/2026-2027

Aizawl; 24^th September,2026: Vawiin khan Aizawl District Bawrhsap Er.Lalhriatpuia, IAS chuan DC Conference Room-ah kum 7 chhung Treasury Square leh a chhehvela  chhum lo chat lova ruihhlo leh sual rem theih nana lo duty tawh mi 15 te thingpui a inpui a. District Administration-in an inpekna an ngaihhlutzia lantir nan chawimawina thuziak (Letter of Appreciation)  pein, duty te thingpui inna tur Rs.15,000/- a hlan bawk.

Vawiin programme-ah hian thu sawiin, Er. Lalhriatpuia chuan "Kan lawmthu sawina hi  beitham hle mah se, khawtlang tana in inpeknaa kan lawmzia, hlutzia leh ngaihsanzia che u lantirna (Token of Appreciation) a nih avangin min pawmsak ngei ka beisei a, in kal zelna turah District Administration chuan duhsakna sang ber a hlan che u a ni," a ti.  

Sawizawmin Er. Lalhriatpuia   chuan "Tunhnaiah Mizoram dung leh vangah ruihhlo a hluar em em a, a dona kawngah nasa taka tanho a tul hle a. Ruihhlo do kawngah Venghlui Paho Zing Duty chuan kum sarih chhung hma in lakna te ka lo hriatin ropui ka ti hle a, in inpekna avangin nasa takin ruihhlo hluar zel tur pawh tihremin a awm ka ring tlat a ni," a ti.

Ruihhlo hi mahni a do chi a ni lova, khawtlangin kan thlah zalen loha kan do tlat chuan rah tha a chhuah zel dawn, DC chuan ti a. A bik takin chhungkhat pa in ruihhlo leh sual tihremna tura ke an pen chhuak chu ropui a ti hle tih sawiin "Ram leh hnam tana in tha leh zung in senna zawng zawngah lawmthu ka sawi a, kan ram hi ruihhlo awm lohna rama siam kawngah hma min lakpui zel turin ka sawm a che u," a ti.

Venghlui Paho pawhin report pein, duty hi July ni 27, 2019 atanga an lo kalpui tawh thu te, a tirah chuan welfare leh Section ang tein hma an la tan a, tunah chuan Branch YMA-a OB nilai leh  Ex-OB te  nen Paho ten mahni thahnemngaihna atangin an kalpui mek zel tih an sawi. Venghlui Paho chuan an hmalakna DC in a hlutsaka a, a hriatpui chu lawmawm an ti hle, tih an sawi a. DC hnenah Treasury  Square leh a chhehvel a lo him zawk theih nana thurawn an neih te an thlen bawk a ni.Letter of Appreciation hi  heng a hnuaia Venghlui Paho hnenah hian Aizawl DC chuan a hlan.

1.Pu R Tlanghmingthanga

2.Pu Vanlalruata Ralte

3.Pu Lalhmingthanga

4.Pu W. Pahlira

5.Pu Thanhlira

6.Pu VL Hmangaiha

7.Pu K Lalchhuanmawia

8.Pu C Zoliana

9.Pu Lalliana Sailo

10.Pi Lianhmingthangi

11.Pu F Lalliansanga

12.Pu Lalkohchhuaha

13.Pu PC Lalsangluaia

14.Pu Churchill Lalchamliana

15.Pu Lalhmingliana Hnamte