2333/2026-2027

Saitual, the 24th September, 2026: Vawiin khan Saitual Kohhran Centenary Hall-ah District Hub for Empowerment of Women (DHEW), Saitual buatsaihin hmeichhiate an hnathawhna hmuna an him theihna atana dan siam “Prevention of Women from Sexual Harassment (POSH) Act, 2013” chungchangah inzirtirna hun hman a ni a, Pi Mary. L. Rodinpuii, Election Officer chu khuallian niin hun a hmanpui.

He hunah hian khuallian Pi Mary. L. Rodinpuii chuan thu sawiin, vawiin training a hlawhtlin theih nana tha leh zung sengtute leh zirtirna pe tura ruat “Resource Person” te chungah lawmthu a sawi a, training hlawkthlak tak an neih theih a beisei thu a sawi bawk. Hmeichhiaten zalen leh thlamuang taka hna an thawh theihna hmun siam chu mi tinte mawhphurhna a ni, a ti a, sawi chhuah ngam loh harsatnate hmeichhiaten an tawh loh nan he dan pawh hi Sawrkarin a duang a ni, a ti.

Khuallian chuan Mizo society-ah taksa intawk zawnga infiam kan ching hle a ni, a ti a, kan hriat lohin dan  bawhchhetu kan nih theih reng avangin hemi kawngah zau zawka awareness kan neih a pawimawh tih a sawi. Kalkhawmte chu uluk taka ngaithla a, hlawkpui ngei turin a sawm a, an zir chhuah te mahni office theuhah hawn ngei turin a chah bawk a ni.

Vawiin training-ah hian Office hrang hranga Nodal Officers, Presiding Officers leh Local Committee member te an tel a, Pi Mary Malsawmkimi, DMC, DHEW  chuan Mission Shakti leh an hnathawhte a sawifiah a. Pi Lucy Remruati Chhangte, Master trainer chuan hmeichhiate an hnathawhnaa hleilenna an tawh chungchang “Understanding Workplace Sexual Harassment” tih thupui hmangin zirtirna a pe a ni. Pi K. Lalhmangaihzovi chuan POSH Act 2013 chungchang a sawi zau a, Pi Lalramhlui, Gender Specialist, DHEW chuan SHE-Box portal chungchangah zirtirna a pe bawk a ni. Kalkhawmte chu Master trainer Pi Lucy Remruati Chhangte chuan zawhna leh chhanna hun a hmanpui bawk a ni.