Vawiin khan Lunglei DC Conference Hall-ah Additional DC Pu Benjamin Lalzama kaihhruaina hnuaiah World Bank suma siam mek Chhumkhum to Chawngte Road chungchang sawihona meeting neih a ni. Meeting-ah hian Chhumkhum to Chawngte Road-a compensation pek chhuah chungchanga lungawilohna nei ram neitute thu ngaihthlak niin Grievance Redressal Committee chuan bawhzui zel dan tur an sawiho. Heng lungawilohna neite hi Rangte, Lalnutui leh Lungrang khua mi te an ni. Meeting kaihruaitu Pu Benjamin Lalzama chuan compensation pek chhuah chu dan behchhan tlat a kalpui a nih tur thu tarlangin kalkhawmte chu hmathlir thui tak nei chunga ram leh hnam tana thahnemngai turin a chah a ni. Meeting-ah hian PWD hotute bakah Rangte, Lalnutui leh Lungrang khaw VC leh YMA hruaitute leh helai hmuna contractor-te an tel a ni.

Chhumkhum to Chawngte Road hi World Bank Funded Project, Mizoram State Roads II, Regional Transport Connectivity hnuaiah Highway 2-Lane tur a siam mek a ni a. JKM Infra Projects Limited, Noida (U.P) in December 2014 atang khan he hna hi an thawk tan a, kum 4 chhunga zawh tur a ni a. Tunah hian kawng laih bakah hmun engemaw zatah culvert leh retaining wall siam mek a ni. 

Chhumkhum to Chawngte kawng hi kum 2006 khan World Bank sum hmanga maintenance thawh a ni a. A kawngin a paltlang hmun thenkhat Sahramzel (Rangte leh Lalnutui inkarah), Panhnah huan (Rualalung leh Chawngte inkarah) leh Chawngte khaw bul Teak huan chhuk hi dam leh leidup hnawng tak anih avangin blacktop a chhe tawh a. Rualalung leh Chawngte inkar hmun tam takah kawng a awih lutuk avangin erosion in kawng a ei chhe nasa hle bawk a. Heng hmun hi kumtin fur laiin motor kal harsatna a ni thin.