Mizoram Youth Commission chuan nizan (26.6.2018) khan Cash Incentive Award semna Lal Thanhawla Auditorium-ah a buatsaih a, Chief Minister Pu Lal Thanhawla chuan he hun hi khuallian niin a hmanpui a. School Education Minister Pu H. Rohluna chu khualzahawm a ni. Cash Incentive Award hi MYC in a vawikhatna atan UPSC leh competent authority dangten exam an buatsaih a tlingte bakah University Gold Medalist-te lawmpuina leh zirlai dangte chawkphurtu atana a buatsaiha ni a. Award dawngtu hi a vaiin mi 65 an awm a ni.

Chief Minister chuan MYC Chairman hmalakna hnuaia thalaite tiphur tura Cash Incentive Award buatsaih a ni chu lawmawm a tih thu sawiin, a dawngtute chu an kal zelnaah hlawhtlinna hmu tura a duhsak thu te, thalaite tam zawkin an zirlaiah leh eizawnna ah hlawhtlinna hmu a, chhungkua leh ram innghahna tlak an nih a beisei thu a sawi a. Sawrkar chuan thalaite tana khawvel thar siam a ngaih pawimawh thu leh, chumi atan chuan kawng hrang hranga phak ang tawka hmalak a nih thin thu a sawi a. Zirna lama export-quality education siam tura hma la in, kumin HSLC leh HSSLC exam result chu kum dang zawng aia a that thu te, infiamna lama infrastructure development siamin, Mizo thalai infiammite pawh India leh khawvel huapa an invawrh chhoh tak thu te a sawi.

Chief Minister chuan thalaite tiphur a “incentive” siam sak tur chuan ram economy pawhin a zir a tul tiin, sawrkar chuan economic policy leh programme hrang hrang a duan thu a sawi a. Mi harsa zawkte khaichhuak tura NLUP kalpui a nih thu te, chumi chhunzawm leh belhchhah tura NEDP duan a nih leh thu te a sawi a. Heng hmalakna avang hian Mizoram chu economy thang zel chuan tha taka hma a sawn chhoh thu sawiin, ram pum GDP aia Mizoram GSDP thanna a tam zawk thu te, GSDP thang chak ber state pali zinga Mizoram a tel thu te, kum khata mimal sum lakluh chawhrual PCI chu India ram pum aia Mizoram PCI a tam zawk thu te, chaw khawpkham awm tlemna ber state Mizoram a nih thu te NITI Aayog report in a tarlan thu sawin, hengte hi Mizoram hmasawn chak zia tilangtu niin lawmawm a tih thu a sawi a. Inkalpawhna tha zawk siam tura hmalak dan sawiin Chief Minister chuan Kaladan Multi Modal Project peihfel thuai tum a hnathawh a nih dan te sawiin, nakin lawkah chuan Mizoram chu India leh Asia chhimchhak ramte nen insumdawn tawnna luhka pawimawh a la nih tur thu te, chumi avang chuan rel kawng pawh Sairang atanga Kawrpuichhuah thleng la chho tura ruahmanna awm bakah Lawngtlai thleng lut tura hmalak mek a nih thu te, thlawhna tum hmun Mizoram chhim lama siam tura ruahmanna siam mek a nih thu te a sawi. Heng zawng zawng hi thalaite tan a remchanna thlentu tur a nih thu leh, an hmakhua tizautu tur a ni tih hre renga hman tangkai dan tur ngaihtuah thiam turin thalaite a chah a.  Mizoram Youth Commission in kawng hrang hranga thalaite hmasawnna tura hma a lakna te ngaihventu an tam chu lawmawm a tih thu sawi bawkin, Mizo thalaite chu hlawhtlinna tha zawk an hmuh theih nan Hindi leh English thiam pawimawh a tih thu a sawi bawk a. “Mizote hi kan tenau lo a, khawvel danga an tih chu kan ti ve thei vek a ni,” tiin Chief Minister chuan vhalaite chu hmalam pan a huaisen taka pen turin a chah a ni.  

Khualzahawm School Education Minister chuan ram thalaite tan sawrkarin nasa taka hma la in, kum kalta lamah pawh eizawnna tha thalaiten an neih theih nana kawng hrang hranga hmalak a lo nih tawh thin thu a sawi a. Mizoram chhung leh pawn leh India pawn thlenga Mizo thalaiten hlawhtlinna an hmuh theih nen leh zau zawka kawng hawng tura MYC in thahnemngai taka hma a la chu lawmawm tiin, tuna Cash Incentive Award chuan a tum ang ngei a thalai dangte pawhin hlawhtlinna hmu ve tura tiphurtu a nih a bseisei thu a sawi a. MYC hmalaknaa Youth Summit & Road Show lo buatsaih tawh chu fakawm tiin, zirlaiten zirna kawng hrang hrang awm leh eizawnna kawng awm theite ah an hriatna tizautu tha tak a ni, a ti a. NEDP hnuaia Entrepreneurship Development Scheme kaltlanga entrepreneurship lamin hma a sawn phah ngei nan thalaite ngaihven tura a duh thu a sawi. School Education Minister chuan hlawhtlinna chu awm mai mai tan nilovin, tumruhna leh taimakna nen thawk thin tan a nih thu a sawi. An tumah chiang se, ‘kan tum chuan kan thei a ni’ tih thalaite chu vawng reng turin a chah a ni.

Award semna inkhawm hi MYC Chairman Pu Joseph Lalhimpuia chuan kaihruaiin, MYC in thalaite hmakhua ti eng tura hmalakna awm mekte a sawi a. Higher secondary school zirlaite tan All India Entrance Exam a tam zawk tha zawka an tlin theih nan sattelite kaltlanga phai institute-te nen inthlungzawm a coaching class siam te, sipai lak October thlaa neih tur atan lo inpuahchahna atan district capital zawng zawnga Mizo thalai sipai tam zawk an tlin theih nan pre-training lo neih lawk tum a nih thu te, sipai lama sakhua hruaitu post awm thin te hnawhkhat tura Mizo theologian an tlin ve theih nan training pek te, Alternative Learning Systems (ALS) nen tangkawpa IAS coaching class batch hnihna chu Aizawl leh Lungleiah August kar hmasa ber atanga tan leh tum a nih thu te a sawi a. India ram pawn a English tawng hmanna rama lehkha zir emaw hnathawk turte tan International English Language Testing System (IELTS) paltlang ngai thin chu coaching siam a nih mai bakah British Council nen inbia in, thawhdunna siamin July ni 30 atanga August ni 2 chhungin Aizawla IELTS exam buatsaih a ni dawn a. MYC chu Mizoram Kohhran Thalaite nen thawhhona neiin, an tan exposure visit buatsaih a nih tur thu te a sawi a. District tina thalai, kum 40 hnuai, zirlai emaw, infiammi emaw, eng hna pawh thawk se, thalaite tana mi entawntlak a ngaihte chu thlang chhuak a cheng nuai khat zel Young Achiever Award pek an nih tur thu a sawi a. MYC Chairman chuan August thlaah Jet Airways in recruitment Mizorama an rawn neih leh dawn avangin tunah hian coaching kalpui mek a nih thu a sawi bawk.

 Pi Muanpuii Saiawi, IFS atangin Motivational Speech ngaihthlak niin, awardee-te atangin V.L. Malsawmzuala, Naval Academy, R. Vanlalhruaia, Lunglei Bazar Veng; Lalruatfeli Ralte leh Vanlalpeka ten thu an sawi a. Pu H. Zothangliana, MLA leh MYC Cash Incentive Cash Award Committee Vice-Chairman ni bawk chuan lawmthu sawiin hun a khar a ni. He Programme-ah hian Dy. Chief Whip Pu RL Pianmawia, MLA tel bawkin, sawrkar depatment hotu pawimawh engemawzah an kal a ni.

 Cash Incentive Award nizan a sem tak hi mi 55 hnenah hlan a ni a. Thla hmasa lama district hrang hranga Youth Summit & Road Show lo buatsaih tawhah mi 10 hnenah Cash Incentive Award hi lo sem tawh a ni a. UPSC Main Examination paltlang leh UPSC Exam kaltlanga NDA a inziak tlingte hnenah cheng nuai khat pek a a ni a, a bak zawng hnenah cheng sing nga theuh sem a ni.