Vawiin hian Salvation Army enkawl Adult Rehabilitation Centre (ARC), Chhiahtlangin kum sawm a tlin lawmna hun ARC Dormitory tual zawlah neih a ni a. Pu Lalruatkima, Minister, I&PR, RD, Revenue, etc., chu khuallian niin Anniversary lungphun a hawng.

He hunah hian Minister chuan, ARC in tluang tak maia a kum sawm cham a thleng thei leh hma lam pan zela a kal hi a lawmawm hle a, kan ram, kan hnam leh kan chhungkua theuh damna hi thil pawimawh hmasa, ka rilrua cham reng thin a ni, a ti. Chutiang hnathawktu ARC hi a hlu em em a he hmun lo dintu leh enkawltute zawng zawng chungah thinlung takin lawmthu ka sawi a ni, a ti. Hetiang Centre enkawl hi thil namailo tak, dawhtheihna, hmangaihna leh Pathian tihna nena thawh ngai a ni a, chutiang hna ropui hlawhtling taka ARC in a thawk hi ram tan pawh a hlu a, Salvation Army dintu William Booth a kawhhmuh kawngah dik takin in kal zel a ni tih a chiang hle a, khawvela hna ropui ber te zinga mi in thawk a ni, a ti. Minister chuan Centre a enkawl mekte pawh duhsakna hlanin chhungkua leh khawtlang tana mi tangkai tak ni tura an lo chhuah leh ngei a beisei thu a hrilh a. Beidawng lova hma lam pan zel turin a fuih a ni. Hlim taka Christmas lo thleng tur duhsakna a hlan a, thilpek a pe bawk a. An Centre panna kawng siamthat an mamawh thu Minister hnena an lo thlen chu a tul anga a lo bawhzui sak tur thu a hrilh bawk a ni.

He hun kaihruaitu Maj. Moses Sairengpuia Sailo chuan ARC in kum sawm a tlin champha lawm hun hi Covid19 vangin vawi tam tak sawn a ni a. Vawiinah a taka kan hmang thei ta hi a lawmawm hle a, kan beisei ang ngei a kan Ministerin min rawn telpui thei hi kan lawm zual a ni, a ti a. Sawrkar phal chin zawm chunga an sawm bik lokal te hnenah lawmthu a sawi a ni. He hunah hian Capt. Lalhruaitluanga, Serchhip CO bialin hunserh a hmang a, Capt. Anthony C. Lalruatfela, Superintendent, ARC, Chhiahtlangin ARC Report a pe a, he Centre a awm tawh aiawh Pu Zothlamuana'n thusawina hun a hmang a, zaithiam ten fakhla sain kal khawm te an awi bawk.

Salvation Army chuan he ARC hi ruihhlo chi hrang hrang leh mipat hmeichhiatna lama nunkawng rap tleu tawhte enkawlna hmun atana kum 2010 August ni 22 khan dahngheh a ni a. He Centre innghahna Pathian thu chu, "Chutichuan heng pathum, rinna te, beiseina te, hmangaihna te a awm reng ang; tin hengah te hian a ropui ber chu hmangaihna hi a ni" 1Kor 13:13 tih a ni.  Kohhran, pawl leh hnam thliar lovin a mamawh apiangte enkawlna a ni a, an harsatna atanga an tal chhuah theihna tura kawng tinrenga hmangaih taka enkawl an nih bakah eizawnna tur thiamthilte pawh zirtir an ni. Tunah hian thawktu pasarih an awm mek a. An hmunhmate a la tet deuh avangin a rualin mi 10 chauh an enkawl thei a, Dormitory lian zawk an sa mek a ni.

Minister hi Pu C. Lalnunkima, MIS, Jt. Director, I&PR, Pu Andrew H. Lalremruata, MIS, IPRO ten Aizawl atangin an tawiawm a, Serchhip atangin Pu Malsawmtluanga, MCS, PD, Serchhip, Pu Vanlalhmachhuana, MCS, BDO, Serchhip leh official dangten an telpui bawk.