Vawiin khan  Chiahpui Community Hall-ah Chiahpui khua in kum 2018-2019 chhunga Mizoram a Village Council tha bera thlan an nih ropui takin ruai nen an lawm a. LAD Minister Pu K. Lalrinliana chuan he hun hi khuallian niin a hmanpui a, bialtu MLA, Human Resources Development Board Vice-Chairman ni bawk Pu L. Thangmawia chu khualzahawm a ni.

Chiahpui mipui hmaah thu sawiin khuallian Pu K. Lalrinliana chuan LAD in Mizoram puma Village Council a enkawl 534 zinga hnathawk tha ber a thlan an ni chu a lawmpui thu a sawi a, hetiang hlawhtlinna chang tur chuan khawtlang mipui an fel a, an hruaitute an fel bawk a ngaih bakah an inrintawn a thawhhona tha an neih a ngai a, thawhrimna nen theihtawp an chhuah tlan a ngai a ni a ti a. Khaw inlungrual leh inhmangaih tawn an ni tih a hriat a hei hi a chhuanawm hle a ni a ti. Minister hian amah ngei pawh Village Council President kum engemawzat a lo nih ve tawh thu sawilangin Village Council hotute hah zia leh thawhrim a ngaih zia, an mawhphurhna san zia a hriatpui a ni a ti a. Village Council member lo ni tawh leh la ni mek te hlutzia hre turin mipuite a chah a, Village Council hruaitute chu an inthlak hun a thleng thin a, chutiang hun a lo thleng a nih pawhin khawtlang hmalakna tha leh thawhhona tha hi chhawm nung zel turin a chah bawk a ni.

Khuallian chuan ei leh bara kan intodelh nan sawrkarin SEDP a kalpui thuai dawn a, tunah hian Board 14 din in heng Board hrang hrangte hian hma chak takin an la mek a ni a ti a, eizawnna ngelnghet kan neih theih na tura hma lak a nih dawn avangin tanpuina dawngtu te pawhin an dawn hunah a thlawn a dawng an nilo tih an inhriat a pawimawh dawn a, hreipui khuai tu thei pawhin tha a mamawh ang bawk khan thawhrimna, rinawmna leh thlan tui nen hma an lak a ngai ve dawn a ni a ti a.  Kan intodelh loh chuan kan huaisen thei lova, hnam zahawm kan ni thei dawn lo a ni a ti bawk. Minister hian Chiahpui Village Council te hnenah lawmpui nan tangka fai leh Computer Set a hlan a ni.

Khualzahawm Pu L. Thangmawia, bialtu MLA ni bawk pawhin thu sawiin VC tha ber ni tura an khawtlang tanrualna leh thawhhona tha chu entawntlak a nih thu leh bial enkawltu a nihna ang pawh a chhuanawm a tih thu a sawi a, VC tha ber nih hian inthlahdah phah a thiang lo a, nasa lehzuala hma sawn tur an nih thu leh, midangte pawhin an enbik tawh dawn a ni tih hria a hmasawn belh zel tura tan mar a tul thu a sawi a ni. Bialtu MLA hian Chiahpui khua in VC tha ber an nih lawmpui nan leh khawtlang huap pawl hrang hrang ten VC te an thlawp that avanga lawmthu sawi nan MHIP hnenah Ketli a hlan a, MUP hnenah Trolley DJ Speaker a hlan a, Games & Sports Association hnenah football, volleyball leh volleyball net a hlan a, YMA hnenah Computer set leh printer a hlan a, Govt Primary School, Chiahpui hnenah Computer set a hlan bawk a ni.

Minister tawiawmtu LAD Director Pu R.S. Lalzamliana bakah Pi Lalhruaitluangi, BDO, Ngopa RD Block leh Chiahpui VCP Pu F. Lalrinchhana te pawhin thusawina hun an hmang a ni.

Local Administration Department leh SIRD & PR tangkawpin Mizoram puma Village Council tha tehfung hrang hrang hmanga teh a kum 2018-2019 chhunga Village Council tha ber a an thlan Chiahpui khua hi Mizoram hmar tawp Manipur ramri dep a awm a ni a, in 250 khua niin Village Council member pali (elected 3 + secretary) an awm a ni. Kum 1868 vel lai khan in 700 khua niin khaw lian tak a lo ni thin a, zohnahthlak hnam hrang hrang awmkhawmna niin tunah hian in 182 awmin mihring 1135 an cheng a, sawrkar enkawl Primary School leh Middle School pakhat ve ve awmin Govt. Aided High School pakhat a awm bawk a. November ni 15, 1984 a Village Council Court din a nih atangin mumal takin tun thleng hian tluang takin an kal a ni.

Chiahpui VC tha ber nih lawmna ah hian Chiahpui khawtlang mipui bakah an chhehvel khua atangin mithahnemtak an tel a ni.