2750/2024-2025

Dated Aizawl, the 29th October, 2024: Chief Minister Pu Lalduhoma chuan vawiin khan a office-ah naktip maia Superannuation pension-a chawl tawh tur Chief Secretary Dr. Renu Sharma, IAS a kawm a. Mizoram tana a hnathawh tha tak tak teah lawmthu hrilhin a hun hman zel turah duhsakna a hlan a. Lawmthusawina lehkha leh thilpek a hlan.

Dr. Renu Sharma pawhin lawmthu hrilhin, Mizoram chu nuam a tih thu leh a hriatreng thin tur thu a sawi a. Mizorama a awm chhunga tha taka thawhpuitu sawrkar leh sawrkar hnathawkte chungah lawmthu a sawi a ni.

Dr. Renu Sharma hian November ni 2, 2021 khan Mizoram Chief Secretary hna a rawn zawm a. Chumi hma pawhin Mizoramah hian a rawn awm tawh thin a. Kum sarih vel zet Mizoramah hian hna a rawn thawk a ni. Tun thla tawp hian Superannuation pension in a service a chawlhsan ve tawh dawn a ni.