Vawiin chawhnu khan Secretariat Conference Hall-ah Chief Commissioner for Persons with Disability leh Rehabilitation Council Of India (RCI) Chairman ni bawk, Dr. Kamlesh Kumar Pandey leh department hrang hrang hotute an thukhawm a. Dr. Kamlesh Kumar Pandey hi Dy. Chief Commissioner for Persons with Disability Pu Sanjay Kant Prasad leh RCI Member Secretary Pu SK Srivastava ten an tawiawm a ni.

Dr. Kamlesh Kumar Pandey chuan pianphunga rualbanlote chawikanna tura hmalakna hrang hrang zingah Persons with Disabilities Act, 1995 leh Rights of Persons with Disabilities Act, 2016 chuan hmasawnna tam tak a thlen a ni, a ti a.  Heng Act-ah hian section hrang hrang awmin rualbanloten midang ruala ke an pen ve theihna tura ruahmanna a ni tiin heng Act hlawhtlinna tur chuan a kaihhnawih department ten thahnemngai takin hna an thawh a ngai a ni, a ti.

Meeting-ah hian Social Welfare, School Education, UD&PA, PWD, Rural Development, Transport, Planning, Finance, ICT, AMC, Higher & Technical Education, H&FW, Labour, Employment, Skill Development & Entrepreneurship (LESD&E) Department hotute leh Commissioner for PwDs an tel a. Department tinin pianphunga rualbanlote tana an hmalakna hrang hrang an tarlang a. Hmasawnna tur sawiho niin Chief Commissioner for Persons with Disability hovin inkawmna hun tha tak hman a ni a. Naktukah hian Chief Secretary Pu Arvind Ray, IAS nen inkawmna hun an nei dawn bawk a ni.

Mizoramah hian rualbanlo ten nun nuam zawk an neih theihna tura hmalakna hrang hrang awmin rualbanlote tan zirna in (school, college etc) 2338-ah ramps, toilet-te ruahman a ni a. Block hrang hrang-ah Special Educator mi 123 an awm bawk. Disability Certificate hi mi 11290 hnenah pek chhuah tawh a ni a. Sawrkar laipuiin rualbanlote ID Card siam dan thar a duan chu Mizoramah pawh kalpui niin district tin hospitalah ID card siam theih tura hmalak mek a ni a. Tun dinhmunah hian Aizawl, Kolasib, Serchhip leh Lunglei civil hospitalah rualbanlote tan ID Card siam theih tawh a ni. Online hmanga ID Card siam duh tan www.swavlambancard.gov.in ah in ziak lutin disability certificate, passport size photo leh address proof a ngai a. Mi 104-in Unique Disability Indentification (UDID) card hi an nei tawh a ni. Accessible India Campaign hnuaiah pawh building 27 thlan chhuah niin heng hmunahte hian rualbanlote tan lift, toilet, handrails (vawn ban) te siam tum mek a ni bawk.