Vawiin khan Champhai District Disaster Management Committee bultumin lirnghing thlen thut pawha chhawmdawl hna thawh dan tur leh chhiatna tam zawk a thlen lohna tur  atana chet lak dan   Mock Drill neih a ni. Mock Drill hi khawpui chhunga hmun thlan bik panga: DRDA Office, Home Mission School, Bazar Pui, Dawrkai Kawn Area leh Tourist Lodge-ah te neih a ni.

Heng hmunahte hian chawhma dar 10:00 ah lirnghing entir nan Siren tih rik niin District thuneitu lam atanga thupek bawhzuiin chhiatrupna thlenna hmun lam panin chhawmdawl hna thawktu  Rescue team leh medical team-te an tlan nghal a, a tul angin chhanchhuah hna a takin an entir a ni. Chhanchhuah  hna hi (Rescue Team) : State Disaster Management Team (SDMT) 2nd IR Battalion  leh Adventure Club, Govt Champhai College-ten thawkin  hliam tuar leh mahni insaseng theilote chhanchhuah dan thiam takin an entir a. Fire & Emergency Services-te pawhin an hmanraw neihte nen thawk chhuakin kangmei chu a hun takah an thelh mit a. Champhai District Hospital Doctor-te leh Nurse-te pawh Ambulance nen thawk chhuakin hliam tuar leh nunna chante bawihsawm dan a takin an entirin hliamna zuala anga langte chu Hospital lama phurh zel an ni bawk a ni. Traffic Police leh MPRO lam ten inkalpawhna leh inbiakpawhna lamte ngun takin an vil reng bawk a ni. 

Vawiina Mock Drill hi Champhai District Bawrhsap Pu Vanlalngaihsaka, IAS hovin District Officer-ten District Emergency Operation Centre (DEOC) atana ruat I&PR Conference Hall-ah an an vil chilh reng a. An uapna hnuaiah hian Mock Drill hlawhtling taka neih a ni.

Mock Drill neih zawh hnu hian debriefing I& PR Conference Hall-ah neih zui niin mawhphurhna hrang hrang neituten report tawi an pe a. Maj Vaibhav Joshi, Central lam atanga endik tura ruat chuan Mock Drill a hmuh dan tlangpui a report bawk a.  A tlangpui thuin Mock Drill chu a hlawhtling a, maherawhchu tih leh hunah hei aia tha zawka tih theih nise tih a ni. District Disaster Management Committee chuan Mock Drill hlawhtling taka neih anih theihna tura mipui leh sawrkar lama thawktute tawiawmnaah   lawmthu a sawi bawk a ni.