1706/2023-2024

Aizawl the 30th August, 2023 : Chief Election Commissioner (CEC) Pu Rajiv Kumar kaihhruai Election Commission Team chuan ni thum cham turin vawiin Thawhlehni hian Aizawl an rawn theng a, kan hma lawka State General Election lo awm tur atana inpuahchahnate endik turin an rawn kal a ni.

Election Commision Team-ah hian Election Commissioner (EC) pahnih Pu Anup Chandra Pandey leh Pu Arun Goel te bakah Pu Nitesh Vyas, Senior Deputy Election Commissioner, Pu Hirdesh Kumar, Deputy Election Commissioner, Pu RK Gupta, Deputy Election Commissioner leh Election Commission of India hnuaia Official pawimawh tak tak sawmpahnih an tel a ni.

An cham chhung hian Mizorama inthlan kaihhnawiha inhnamhnawih mi pawimawh tak takte an kawm a, heng zingah hian political party aiawhte bakah Sawrkar agency leh Department, inthlanna muanawm leh felfai, mitin ban phak, huapzo leh telna kumin kum tawpa neih tura mawhphurhna hrang hrang neite an tel a, inthlan hun tur tak erawh Election Commission of India in a la rawn hriattir leh dawn a ni.

A ni khatnaah political parties aiawhte kawmin an ngaihdante an zawt a, rawtna leh ngenna thlente an ngaihthlak sak a. Hemi hnu hian enforcement agencies hrang hrangte atangin inpuahchahna an kalpui tawh dan tlangpuite an ngaithla leh a, Chief Election Commissioner chuan State leh State inkalpawhna ramri, a bik takin thenawm State nena inrina Interstate Check Post kaltlanga dan phal loh sumfai, zu, damdawi leh vote zawn nana a thlawna thil sem chhuah tur ang chite ngawrh lehzuala veng turin a hriattir a. Thenawm State dangte nena inthurualin dan phal loh thilte man hmak hmak tur leh dan bawhchhetute'n thuneitute an hlauh theih nante leh ECI duhdan anga thlemtu awm lo inthlanna muanawm siam tura theihtawp chhuah turtein a chah a. State Police, CPF, State Excise & Narcotics Department leh Narcotics Control Bureau Official-te chu damdawi avanga harsatna thleng theite titawp tura ngun taka ngaihven reng thin turin a chah a. Social media kaltlanga thil phochhuahte dan kalh a ni em tih leh thu belhchian dawl lo, inthlanna boruak tihmelhem thei ang zawngte a awm em tih ngun taka vil fo turin a chah bawk.

Hemi hnu hian Chief Electoral Officer, State Police Nodal Officer leh CAPF Nodal Officer-te kawm ve lehin inthlanna neih tura inpuahchahna tlangpui leh thlen tawh chinte an zawt a, venhim hna thawktu tur leh ruahmanna siamte chu an zirchiang bawk a ni.

A ni hnihnaah hian Mizoram chhung District hrang hrang 11 a District Election Officer leh Superintendent of Police theuhte kawmin an hmalak dante District Election Officer hnen atangin an ngaithla a. Election Comission Team chuan District Official-te chu tun aia vote thlak an tam zawk theih nana tan la tur te, a hmei a pa, thalai leh khawpuia chengte'n vote an thlak uar lehzual nana SVEEP Campaign leh District mila hmalak ngaih bikna laiah tan la turin a chah a. Electoral Roll dik leh felfai zawk neih a nih theih nan tuna kalpui mek 2nd Special Summary Revision chu uluk lehzuala nei turin a chah bawk. Heng bakah hian State Sawrkara thuneitu Chief Secretary leh Director General of Police-te bakah Secretaries Government of Mizoram hmuin inthlanna atana inpuahchahnate an sawipui a, hemi hnu hian Aijal Club, Aizawl-ah Chanchinbumite kawmna hun an hmang zui leh a ni. He hunah hian CEC chuan inthlanna muanawm leh felfai tak buatsaih a nih theih nana Election Commission of India hmalakna tlangpui a tarlang a. Chanchinbumite chu mipui thlan Sawrkar din kawngah phak ang tawka tha thawh turin a sawm a, mipuite chu inthlanna kaihhnawiha tel ve ngei tura zirtir uar tur leh thuthang dik lo leh inbumna laka fihlim tum tura zirtir thin turin a chah bawk.

A ni thumna leh tawpnaah Election Commission Team-te hian khawpui chhung hmun laili lai tak Assembly House Annex Building-a SVEEP Exibition buatsaih an tlawh an tum bawk a ni, he hunah hian State Icons, PwD Voters leh thalai vote neite kawmin hun an hmang a ni.