1705/2023-2024

Kolasib dated 30th August 2023: Vawiin chhun khan Pu Lalruatkima, Minister, Rural Development Department chuan Joint YMA Field, Vairengtea phul lem phah hawnna hun chu khuallian niin a hmanpui a. Pu Lalrinsanga Ralte, MLA, Serlui Assembly Constituency chu khual zahawm niin Pu John tanpuia, Secretary, Mizoram State Sports Council chuan hun a kaihruai a ni.

Minister Pu Lalruatkima chuan mizo thalaiten hriselna leh infiamna kawng a hmasawnna an hmuh zel theih nan Sports Department hmalakna hrang hrang chu fakawm a tih thu sawiin Vairengte khua a infiammite tan a phul lem phah tharna khelmual changtlung tak hawn theih a buatsaih a ni chu lawmawm a tih thu a sawi.

Minister chuan harstana hrang hrang paltlang tur a khawtlang, kohhran leh tlawmngai pawl te tanrual a pawimawh thu sawiin kan ram a hmasawnna thleng tur pawh hian tanrualna leh thawhhona tha neih a tul thu a sawi. Infiamna lam a hmasawnna bak ah Rel hmang a inkalpawhna tha awm tur a hmalakna te, Tui alh thei leh inchhung a hman LPG gas hnianghnar zawk chhekkhawl a nih theihna tur hmunhma ruahman a nih thu te, buhfai dah khawlna tur FCI Godown sak mek a nih thu tarlangin lirthei hmang a inkalpawhna tha 4-Lane siamna tur hna pawh tan thuai beisei a nih thu a sawi a. Kolasib district paltlangtu National Highway rang tak a thawmthat a nih theih nan a enkawltu NHIDCL hotute pawh ngun tak a hrilh an nih tawh thu a sawi bawk a ni.

Pu Lalruatkima chuan Sawrkar hmalaknain chhungkaw khawsak harsa zual dawmkan nan hmalakna hrang hrang kalpui a nih thu a tarlang a, ni 100 inhlawhna siam a nih dan te, in tin a inthiarna mumal a awm theih nana hmalak dan te, in tin a kawlphetha thlun zawmna tur a hnathawh dan te tarlangin hriselna leh faina kawng ah pawh hmalakna hrang hrang kalpui a nih thu a sawi a. Serlui Assembly Constituency bialtu MLA thahnemngaihna avang leh Sawrkar hmalakna avanga Vairengte a phul lem phahna Football Field changtlung tak hawn tak chuan infiamna, hriselna, taksa invawn chungchang ah leh mahni inthunun theihna kawng ah Vairengte thalaite nun ah rah tha a chhuah ngei a beisei thu a sawi.

Minister chuan Vairengteah Basketball leh Volleyball Court tha tak sak leh thuai tur a ruahman a nih thu tarlangin sahimna zawng a kan zohnahthlak hmun hrang hrang ami te, Mizoram a rawn raltlan te chu duhsak tak a lo dawngsawng zel turin kalkhawmte a chah bawk a ni.

Khual zahawm Pu Lalrinsanga Ralte, MLA chuan khawpui leh khaw lian zawk a awm thin phul lem phahna Football Field chu Vairengte khua ah a awm ve ta chu lawmawm a tih thu sawiin Serlui Assembly Constituency a hmasawnna a thlen zel theih nan theihtawp a chhuah zel tur thu a sawi a. Ramri hum nana khaw huaisen, ram leh hnam tan a tlan chhe ngai lo, Vairengte khawtlangin infiamna lam ah hmasawnna hmel thar a hmu chu lawmawm a tih thu sawiin khelmual changtlung tak a awm belh zel theih nan ruahman hrang hrangte siam a nih thu a sawi bawk a ni.

Serlui bialtu MLA chuan ramri humhalhna hmanraw pawimawh tak chu ramria khua awmte kawng hrang hranga tih hmasawn a nih thu tarlangin chumi tur chuan Department hrang hrang kaltlangin hmalakna pawh kalpui a nih thu a sawi bawk a ni.

Joint YMA Field, Vairengtea phul lem phah hawnna hun ah hian Pu Lalrammawia Ralte, President, Joint Village Council chuan khawtlang aiawh a thusawina hun neiin Pu James Lalramnghaka, Asst. Engineer, Mizoram State Sports Council chuan Technical Report a pe a, Pu Zalawta, President, Joint YMA, Vairengte chuan lawmthu sawina hun a hmang bawk a ni.

Technical report a tarlan danin Joint YMA Field, Vairengtea phul lem phahna hi Special Assistance to State for Capital Investment (SASCI) hnuai a cheng nuai 600 hmang a hmalakna a ni a. Hna hi April ni 5, 2023 a thawh tan niin August ni 23, 2023 khan thawh zawh a ni. Phul lem phah hi 107 metre a thui leh 68 metre a zau a ni a, he hmalakna hnuai ah hian Pavillion sak, zun in sak, Field hung kual leh a sir laih zau hna te a tel bawk thu tarlan a ni.