Vawiin khan Aizawl District Election Office buatsaihin Sensitization Workshop on EVM and VVPAT, Vanapa Hall-ah neih a ni. 

Pu S.B. Shashank, Chief Election Officer (CEO) chuan thusawiin Sensitization Workshop a lokal zawng zawng hnenah lawmthu a sawi a. EVM leh VVPAT khawl awmdan leh a hnathawh dante sawi fiahin, vote thlaktu chuan VVPAT hmangin a vote-a finfiah theih a ni, a ti a. MLA Election, 2018-ah hian Polling Station zawng zawngah EVM leh VVPAT hman a ni dawn a ni, a ti a. VVPAT awm chuan mipuiah pawh rintawkna a tuh a rin thu a sawi bawk a ni. Mizoram pum puiah EVM leh VVPAT hmelhriatna leh hrilh hriatna chu voter zawng zawng hnena thlen tum a ni, a ti a. Political Party, MPF, NGO aiawh lokal  leh zirlai te chu an awmna hmun theuha midangte EVM leh VVPAT la hrelo te hnena hrilh chhawng zel turin a ngen bawk a ni.

Aizawl Bawrhsap Dr.A.Muthamma pawhin thusawiin EVM leh  VVPAT chu khawl hmanga vote thlakna a ni a, MLA General Election, 2018 atan hman vek tawh tur a nih avangin mipuite hnena inhrilh hriatna chu a pawimawh em em a ni, a ti a. VVPAT ah hian printer awmin, vote thlaktu in paper slip a in print chu second 7 chhung a hmu thei dawn a ni, a ti a. Election Commission thuchhuak angin vote thlak tu tur ten EVM leh VVPAT an hmelhriat hi ngaih pawimawh a ni, tiin a sawi a. Political Party leh Chanchinbu lama thawkte tan hriat chian leh zual a pawimawh bawk a ni, a ti a. EVM leh VVPAT hmelhriatna zau tak Mizoram-ah neih a nih chuan, vote thlak percentage pawh a tam leh zual ang, tiin a sawi a. Workshop a lokal Political Party, NGO, MPF aiawhte leh college zirlai naupangte mock poll booth an siamah vote thlak chhin turin leh an hriatchian loh te zawt zel turin a sawm bawk a ni.

He hunah hian Pu Zorammuana, Jt. Chief Electoral Officer chuan Awareness on EVM & VVPAT presentation a pe a. Hei bakah hian EVM & VVPAT Awareness video clip te chhuah a ni a. EVM leh VVPAT chungchang zawhna leh chhanna neih a nih hnuah Mock Poll Station-ah vote thlak chinna neih a ni. 

He hun hi Pi Lalzarmawii, IAS; Dr. Lalhriatzuali Ralte, IAS leh midangte pawhin an telpui a ni.