Vawiin khan Ruihhlo Do State Level Core Committee chu an Chairman Chief Minister Pu Lal Thanhawla kaihhruaiin CMO Conference Hall-ah hmalak dan tur ngaihtuahin an thukhawm. Home Minister Pu R. Lalzirliana, Social Welfare Minister Pu PC Lalthanliana leh Health Minister Pu Lal Thanzara bakah member dangte an tel kim hle a ni.

Chief Minister chuan ruihhlo do kawngah a  chhuahna lam leh a hmangtute enkawl bakah ruihhlo hmang thar an pun belh zel loh nan huap kim leh tha thlah miah lova thawhho pawimawh a tih thu a sawi a. Mizorama ruihhlo luhna ber thenawm rama Chin State hruaitute nen pawh inbiakna neih a ruihhlo do kawnga thawhho theih dan kawng zawn tha a tih thu te leh, YMA te pawh Myanmar ah kal a zirchianna an han nei chu lawmawm a tih thu a sawi bawk.

Vawiin Ruihhlo Do Committee thukhawm chuan hmalakna atana sum cheng nuai 200 awm hman dan tur hrang hrang duan chu thlir hova pawm a ni a. Thalai, zirlaite zingah te, kohhran leh YMA ah te awareness neih a, print leh electronic media hmanga inzirtirna pek te, data tha zawk nei tura kum tlinglo zinga ruihtheihthil ti awm zat zirchianna leh drug treatment centre changtlung zawkte kalphung zir tura study visit neih te, thingtlanga Link Worker te needle/syringe exchange programme kalpui tanpui te, Supply Reduction lama Police leh pawl dangte hmalakna tihchak te leh Master Trainer tur train chhuah te a tel a ni.

Ruihhlo ngaite an lo dam theih nana OST inenkawlna a tam thei ang berin an dawn theih leh ngaihven nachang an hriat theih nan kohhran leh tlawmngai pawl anga inhrilhhriatna tam zawk nei se tih sawi a ni bawk. Ruihhlo vanga man te thiamloh chantir leh hrem chungchanga chak zawk leh awmze nei zawk a hmalak theih dan te vawiin committee ah hian sawi a ni bawk.