Mizoram State Sports Council (MSSC) hnuai atanga Lawngtlaia Central YLA khelmuala phullem (synthetic turf) phah chu vawiin khan Sports & Youth Services Minister, MSSC President ni bawk Pu Zodintluanga chuan inkhelh nana hman theih turin a hawng.

CYLA khelmuala phullem phah thar hawnna inkhawmah hian Pu Zodintluanga chuan Lawngtlaia phullem phah chu District mipuite tan thil chhinchhiah tlak tak nia a hriat thu sawiin, phullem phah thar avang hian tun atanga kum rei lo teah chuan Lawngtlai atangin footballer tha tak tak an lo la chhuak sup sup dawn a ni, a ti a. 

Mizo naupangte hian talent an nei tha a, an talent hai chhuak turin District-a Sports Association te, District Football Association te leh Young Lai Association te'n naupang chher chhuah lam ngai pawimawh a, grassroot football an uar a pawimawh ang, a ti a. A tul chuan coach pawh an pek theih tur thu a sawi.

Infiamna chu hriselna leh mahni inthununa invawn theihna (discipline) atan a pawimawh tih sawiin, Pu Zodintluanga chuan naupangte hi sports-ah teltir ve vek tur a tih tlat thin thu a sawi a. Sawrkarin thalaite leh infiam mite hmakhaw ngaia hma a lak atangin Mizote chuan infiamna kawngah hma sawnna rahbi thar tam tak kaiin, 

India ram leh khawvelah pawh kan lang chho ta nawlh nawlh a, a lawmawm hle a ni, a ti. Football turf tam tak enkawl uluk loh avanga hma taka chhe ta mai a awm thin thu sawiin, enkawl dan dika enkawl chuan kum 20 daih tur chu neitu nihna nen uluk taka enkawl turin CYLA, DFA leh mipuite chu a chah nghal.

Khuallian chuan Lawngtlai harsatna ber tui harsatna su kiang tura hma lakna Greater Lawngtlai WSS chu fur tui lianin Tuipui pump intake a chim avangin khua a thal veleh siam thain hawn a nih tur thu a sawi a. UD&PA hnuaiah Lawngtlaia in sa thei lo chhungkaw 500 in sakna tur tifelin, 200 chuan bul an tan tawh thu a sawi a. Chhungkaw 2000 in sakna tur pawh sawrkar laipuiin pawm tawhin, tun atanga rei lo teah pek chhuah a nih tur thu a sawi bawk.

Khual zahawm, AH & Vety Minister Pu C. Ngunlianchunga chuan Mizoram sawrkarin Lawngtlai District mipuite thil ropui tak min tihsak a ni tiin, a hlawhtlinna tur erawh chu District chhung thalaite kutah a innghat a ni, a ti a. Football chu ei zawnna atan hman theih a ni a, phullem phah thar chu football hmanga ram hma sawn nan hman tangkai ni ngei se a duh thu a sawi.

Khual zahawm dang Lawngtlai East bialtu MLA Pu H. Zothangliana chuan CYLA khelmuala phullem phah thar leh Lawngtlaia sawrkar hma lakna thar tam tak awm chu sawrkarin Lawngtlai mipui min duhsakzia tilangtu a ni tiin, min duhsaktute hriat reng leh lawm nachang hriat chu mipuite bat a ni, a ti a. Phullem phah thar chu Lawngtlai District-in malsawmna tam tak aa dawn phahna a nih a beisei thu a sawi.

Lai Autonomous District Council-a Chief Executive Member Pu T. Zakunga pawhin thu sawiin, an awh ve em em, nei thei lo tura an inngaih tawh hnua phullem phah khelmual an nei ve thei ta chu lawmawm a tih thu sawiin, Lawngtlaia CYLA khelmuala phullem phah a nih theih nana hma latute chungah Lairam mipuite ai awhin lawm thu a sawi nghal.

Khelmuala phullem phah thar hawnna hunah hian MSSC Secretary Pu C. Laltlanthanga chuan kal khawmte lawmna thu a sawi a. MSSC Asst Engineer Pu James Lalramnghaka chuan phullem phah hna kal chhohpui a nih dan a sawi a. CYLA President Pu J. Sangthangpuia chuan lawm thu a sawi bawk.

Vawiina phullem phah hawnnaah hian zaithiamte zai ngaihthlak niin, CYLA chuan hnam lam an entir a. CEM team leh CYLA team-in phullem thar lawmna exhibition football match an khel nghal bawk. Phullem phah thar hi MSSC chuan CYLA kutah a enkawl mawhphurhna an hlan nghal a ni.

CYLA khelmuala synthetic football turf phah tur hian kum 2017-2018 khan Ministry of Youth Affairs & Sports - Khelo India Scheme hnuai atangin Rs nuai 450 hmuh a ni a. Turf phah hna hi Lushai Engineers, Ramhlun, Aizawl chuan thawkin, May ni 26, 2017 khan thawk tanin, August ni 24, 2018 khan tha taka zawh fel a ni.

Turf phah zau zawng hi a dung metre 110 leh a vang metre 74 a ni a. Football line hi permanent marking-a rin vek niin, a dung metre 105 leh a vang metre 69-a zau a ni a. Security fencing fit 7-a sanga hung kual a ni. An synthetic football turf phah hi Xtreme TurfD60 niin, FIFA approved company Act Global USA siam a ni.