Vawiin khan Pu H. Rohluna, Education Minister, chuan Mamit Luangpawl venga Rs 233.70 lakhs senga sak District Institute Education & Training Building, Mamit District a hawng. He hun hi Bialtu Minister Pu John Rotluangliana, Transport, etc chuan khualzahawm niin a telpui bawk.

Pu H. Rohluna, Minister chuan DIET tana mellung pawimawh tak Mamit District tana hawn a ni ta chu thil lawmawm leh hmasawnna a ni a ti. Mizoram Sawrkar hnuaiah zirna in hmasawnna hmel hmu chho mekin District khawpui te tan DIET hawn chhoh mek zel a ni a ti. Education Minister chuan zirna sikula thawk zirtirtu training lote chhawr chhunzawm loh ni se tih a nih avangin zirtirtu te training tir an ni a, tunah hian In- serivice training kalpui chu zawhfel thawkhat tawh niin Pre-Service te tan training kalpui leh mek a ni a ti. .

Education Minister chuan kan rama zirna quality siamtha turin a bul thut a tanga, kan tan a ngai a ni a ti a, kan ram chu Education reforms commission dungzuiin zirna ah a kal chhoh mek a ni tiin,  naupang zirtir dan leh enkawl dan thiam tak taka kan zirna quality ti danglam tur chuan DIET atanga training chhuak ngei te an pawimawh thu a sawi. District hrang hranga DIET te chu Higher Secondary School teacher te tan Refresher course neihna tur an nih tawh dawn avangin tun aia in tuaihriam leh zuala, kan ram zirna an kuta in nghat thui tak mai chu hrechiang turin a chah bawk a ni.

Minister chuan Mamit Higher Secondary School-ah session thar atangin  Sceince zirna hawn a ni dawn a ni a ti a. Mizoram Sawrkar chuan  Central Service lamah kan thalaite tam zawk kan luh theihna turin coaching centre changtlung tak tak a din chhoh mek a, zirna atana hmasawn chu kan ram hmelhmang leh hmasawnna awmze neia kan thanna tur pawimawh tak,  a nih avangin tan lakna tur awm ang ang  sawrkar theihtawp chhuahin hma a la chho mek zel dawn a ni a ti bawk.

He hun khualzahawm nia hmanpuitu Pu John Rotluangliana pawhin thusawiin Mamit District tana tangkai tak Building hawna ni ta chu Bialtu pa a nihna angin lawmthu a sawi a, Mamit khawpui chu kan vannei hle a,  tun maiah pawh Sawrkar Office building pawimawh tak tak hawn a ni ta chu bialtu Minister a nihna angin Sawrkar chungah lawmthu a sawi a, District Supply Office leh quarter thawmthatna tur Suppy Ministry atangin  44 crore hmuh a ni a, tunah hian 1st Installment atan Rs 12 crore chu a lo kal mek a ni a ti. Sawrkar Building leh kawng hrang hranga hmasawnna kan hmuhah te neitu thinlung pu turin kalkhawm mipuite a chah bawk a ni

Bialtu Minister hian JNV School sak zawh loh avanga buaina kan neih chingfel turin District thuneitute nen hmalak a ni a, Women Politechnic luah hawh rih tura,  hmalakna pawh a bawhzui thu sawiin, JNV School chu Central Sawrkar atanga enkawl leh vil a ni a, harsatna an tawh thinte, School thuneitute atang hrilhriat,  a ni ngailo na chungin Social Media kaltlanga,  an harsatna a hmuhte chu chingfel tura hma chak taka a laksak thin thu a sawi bawk. 

Sr. Er Lalngaisanga, SDO Project Division Technical Report peka a lan danin DIET Building Mamit  hi Centrally Sponsored Scheme hnuaiah Rs 233.70 lakhs senga sak a ni a, ni 17.8.2015 atanga sak hna thawh tan niin,  ni  8.6.2017 khan zawhfel a ni. A building zauzawng hi 789.98 sq.m  a ni a, mizopa chhiara chhawng thum a ni. Building Structure hi a tha thei ang bera thuam leh sak niin Rualban lote tan inthiarna siam a ni bawk. Tunah hian DIET Mamit-ah hian thawktu Principal 1,  Lecturer 13 leh , Non Teaching Staff 13 leh Hindi Teacher 1 an awm mek a ni.

DIET, Mamit Building hawnna hun hi Pi Esther Lal Ruatkimi, IRS chuan kaihruaiin Pi Laldawngliani Chawngthu SCERT chuan lawmthu sawina a nei bawk. Pu Lalsangvuana, Principal  DIET Mamit chuan thusawina a nei bawk. Mamit khawpui chhunga Sawrkar Department hrang hrang aiawh, Tlawmngai pawl hrang hrang aiawh leh thutharthehdarhtute an tel a ni