4382/2023-2024

Aizawl. 28th March, 2024 : Vawiin khan Pu Madhup Vyas, Chief Electoral Officer, Mizoram hovin a pisa ah Lok Sabha MP thlan huna vote tla a that theihna tur ngaihtuahin sawrkar hotu pawimawh an thukhawm.

Chief Electoral Officer chuan inthlanpui awm apiangin MLA inthlan aiin Lok Sabha MP thlanna ah vote tla a chhe ziah tih sawiin, MLA inthlanpuiah India ramah pawh vote tlak thatna ber an nih thin laiin a hnu lawk thla 4 awrh ah Lok sabha MP thlan lehnghal a ni a, MLA inthlanpuia vote tla a phak loh bakah Lok Sabha MP thlan hnuhnung ber kum 2019 ah phei chuan national average vote tla pawh kan pha lo a, tan kan lak a tul hle a ni a ti.

Vawiin thutkhawmah hian mipuite hnena vote thlak tura zirtirna kalpui dan tur chi hrang hrang ngaihtuah niin kalphung pangngai lo deuh, thil thar chhawpchhuah chi hrang hrang te sawiho a ni a. A bik takin thalaite leh a vawikhatna atana vote thlak tur (first time voters) te hnena hmalak dan tur uluk taka sawi a ni a, micro-level ah tan lak a ngai hle tih sawi niin, School Education department, Higher & Technical Education Department leh Sports & Youth Services Department kaltlanga hmalak dan chi hrang hrang duan a ni.

Vawiin meeting-ah hian Dr H. Lianzela, Addl. Chief Electoral Officer, Pu James Lalnunmawia, Joint Chief Electoral Officer, Pu Lalnunhlua, Sports & Youth Services Director, Aizawl bawrhsap Pi Nazuk Kumar, Pi R. lalnunthari, Joint Director, School Education, Dr Lalthansangi Fanai, Jt. Director, Higher & Technical Education, Pu Henry C. Lalrawnkima, Deputy Chief Electoral Officer, Pu R. Lalfamkima, Scientific Officer, MIRSAC leh Election Deparment official te an tel a ni.