4383/2023-2024

2024 Vau thla ni 28: Vawiin khan Lai Autonomous District Council (LADC) hnuaia Village Council (VC) Inthlanpui buatsaih tura Summary Revision of Electoral Rolls, 2024 kalpui tur chungchangah LADC huam chhunga Village Level Officer (VLO)-te tan Lawngtlai DC Conference Hall-ah thil pawimawh hrang hrang inzirtirna training buatsaih a ni.

Pu Samuel Lalmalsawma Sailo, SDC leh Pi Saithantluangi Zote, SDC te chuan training hi pein, electoral roll-a hming paih, hming thlak, siam ṭhat leh awmna hmun sawn dan te, EPIC bo leh chhiat avanga a thar dil theih dan te, Form hrang hrang hman dan leh VLO-te tana mobile application leh portal hman dan bakah, VLO-te tana hriat tur pawimawh hrang hrang an zirtir a. Zawhna leh chhanna leh sawi hona hun hman a ni bawk.

He hunah hian LADC huam chhunga VC Constituency 99-a Village Level Officer-te koh khawm niin, training hi thawh hniha buatsaih a ni.

LADC VC Inthlanpui atana draft electoral roll chu vawiin khan tlangzarh niin, VC electoral roll aṭanga paih ngai emaw, belh ngai emaw, siam ṭhat tur emaw neite tan March ni 28, 2024 aṭanga April ni 5, 2024 chhungin claim & objection hun hawn a ni a. India khua leh tui, tribal, April ni 1, 2024-a kum 18 tling chinte chu VC electoral roll-ah hian thun theih niin, a duh tan mahni bialtu VLO-te hnenah ngaihven theih a ni a. Final electoral roll hi April ni 17, 2024-ah tlangzarh tura ruahman a ni.