58/2024-2025 

Aizawl. 4th April, 2024 : Vawiin khan Pu Madhup Vyas, Chief Electoral Officer, Mizoram hovin a pisa ah Lok Sabha MP thlan huna vote tla a that theihna tur ngaihtuahin sawrkar hotu pawimawh an thukhawm.

Chief Electoral Officer chuan India ram inthlanpui lo awm tur hi khawvelin a ngaichangin a thlir thup dawn tih sawiin, khawvela democracy ram lian ber kan nih ang ngeiin khawvel mithmuhah entawntlaka kan awm a ngai a, hemi atana pawimawh chu mipui vote tla a that hi a ni  a ti a. A tlem berah  MP election hmasa aia 5% tala vote tla a pun theihnan theihtawp chhuaha kan tan tlan a ngai a ni a ti.

Kar hmasa lama hemi chungchang sawihona neih tuma hmalak dan tur rel te bawhzui a nih dan ngaihthlak niin Higher & Technical Education Department chuan Mizorama sawrkar leh private college zawng zawngah lehkha pek chhuah a nih thu leh chhanna pawh dawn a nih thu an sawi a, zirlai zingah an khaw lama vote thlak tura haw ngaite tan chawlh pek an nih tur thu leh an attendance in a tawrh dawn loh thu tarlan a ni bawk a, vote an thlak ngei a ni tih finfiahna awm ngei se a that thu sawi a ni a. College tin ten an hmalakna report an thehluh tur thu leh CEO office a heng report te hi thawn a nih tur thu tarlan a ni bawk.

School Education Department pawhin zirna in zawng zawngah thupek nan chhuah thu tarlangin, zirlai vote la nei lo te pawh inthlanpui pawimawh hrilhfiah a, an chhungte zinga vote nei ten an thlak ngei theihna tura hmanraw tangkai ni tura inzirtirna kalpui mek a nih thu tarlan a ni.

Sports & Youth Services Department pawhin an hnuaia NCC leh NSS zawng zawngte bakah Adventure Club 81 hnenah vote thlak tura infuihna leh midangte zirtir chhawng tura ngenna an thawn chhuak tih an sawi a, digital; flyers bakah kawng hrang hranga hma an lak thu tarlan a ni.

Science & Technology Department pawhin an thawhpui NGO hrang hrangte kaltlanga hma la tura an inbuatsaih dan te tarlangin, Mizoram Pollution Control Board hnenah an hnuaia eco-club hrang hrangte nen thawkho a hma la tura ngen nise an ti a ni.

Vawiin meeting-ah hian Dr H. Lianzela, Addl. Chief Electoral Officer, Pu James Lalnunmawia, Joint Chief Electoral Officer, Pu Lalnunhlua, Sports & Youth Services Director, Dr Lalthansangi Fanai, Jt. Director, Higher & Technical Education, Pu Henry C. Lalrawnkima, Deputy Chief Electoral Officer, Pu R. Lalfamkima, Scientific Officer, MIRSAC leh Election Deparment official te an tel a ni.