57/2024-2025 

Champhai, the 4th April, 2024: Vawin khan Government Champhai College (GCC) leh Agricultural Technology Management Agency (ATMA), Champhai District-te chuan thawhdunna thuthlung Memorandum of Understanding (MoU) an ziak. MoU ah hian Pu P. Lalhmingliana, Principal, GCC leh Dr. C. Lalhriatpuia, Project Director, ATMA, Champhai District-te'n hming an ziak a ni.

He hun Dr. Laldawngliana, Associate Professor, GCC kaihhruaiah hian Pu P. Lalhmingliana, Principal, GCC chuan thu sawiin, New Education Policy (NEP) ah Agriculture kaihhnawih a pawimawh zia leh College zirlaite chu Agriculture-ah thiamna nei se a duh thu a sawi a. Zirlaite chuan sawrkar hna an hmu vek lo a nih pawhin NEP ah hian mahni intodelhna khawp thiamna an neih vek a tul thu a sawi a, chung zingah chuan Agriculture chu a pawimawh hle a ni, a ti. Agriculture leh a kaihhnawih dangtea thiam bikna nei ATMA, Champhai nena thawhdunna tur MoU an ziak thei chu lawmawm a tih thu sawiin, zirlaite tan hlawkna leh hmasawnna a nih a beisei tlat thu a sawi a. MoU chu Govt. Champhai College tan leh ATMA tan bungthar kaina pawimawh tak a nih thu a sawi bawk.

Thusawitu dang Dr. C. Lalhriatpuia, Project Director, ATMA, Champhai District chuan Agriculture zirtirna chu zirlaite atanga bultan a fuh ber thu leh kan rilru put hmang kan thlak loh chuan thingtlang lo neih chu bansan a har thu sawiin, zirlai te'n thiamna neia scientific agriculture an hmelhriat a pawimawh thu a sawi a. Hemi atan hian skill training of rural youth-te, farm school-te nen zirlaite chu a tak ngeia practical demonstration neih pui an tum thu a sawi a. MoU chungchangah College-a thawkte leh ATMA hnuaia thawkte an lungrual tlang thei chu lawmawm a tih thu sawiin, theihtawp chhuah tlan a beisei thu a sawi bawk.

He hunah hian Dr. Ellie Lallianpuii, Coordinator, NEP Implementing Cell, GCC chuan report pein MoU chuan pawisa lam hlawkna tur financial benefit a kentel loh thu a sawi a. Thiamna leh hriatna inhlantawnna tur a nih thu sawiin,  Research Activity, Workshop, Seminar leh Training-te neihho tur a nih thu a sawi a. A pumpuia thlirin MoU tum ber chu zirlaite hmasawn zelna tura hmalakna a nih thu leh chu chu NEP thiltum pawh a nih thu a sawi bawk.