56/2024-2025 

Kolasib dated 4th April, 2024: Vawiin chawhnu khan Kolasib DC pisaah Kolasib khaw chhung hmun hrang hrang a lirthei hunna tur hmun ruahman te ennawnna neiin Kolasib District Traffic Management Committee chuan thutkhawmna an nei a. Pu John LT Sanga, Deputy Commissioner chuan hun kaihruaiin Pu David H.Thangliana, SP chuan tun a Kolasib khaw chhung a lirthei tlan dan leh an dinna tur hmun ruahman a nih dan sawi zauna hun a hmang.

Pu John LT Sanga, Deputy Commissioner chuan Kolasib chu khaw thang chak tak a nih angin lirthei pawh a pun chak thu a sawi a. Inkaihhruaina mumal tak a awm loh chuan lirthei pung zel avangin khawpui chhung a kan kawng neih ten min dawl zawh loh thuai a hlauhthawnawm thu sawiin harsatna lian zawk a thlen hma hian Sawrkar, khawtlang leh tlawmngai pawl tangkawp a hmalak a pawimawh thu a sawi.

Thutkhawmnaah hian Kolasib khaw chhung a lirthei hmang a eizawng, mihring phur leh bungraw phur lirtheite din theihna hmun ennawn niin hmun lunlai ah te chuan mimal lirthei din vena tur hmun zau zawk ruahman a tul thu tarlan a ni a. Bungraw sem lirthei din theih hun chhung pawh ennawn a tul thu sawi a ni. In sakna bungrua kawngpui a chhek khawm thin te pawhin vantlang tan a harsatna an siam loh nan inkaihhruaina mumal tak duan thuai a tul thu sawi a ni a. Lirthei pung chak lutuk tur tihziaawm nan Public transport hman tangkai a tul thu sawi a ni bawk. Traffic police indaih lohna phuhru turin Traffic Warden ruat a nih theih nan hmalak mek a nih thu te, Diakkawn Square-a Speed breaker dah a tul thu leh lirthei hun lohna tur hmun hneh tak a vil dan tur te rel niin rawtna hrang hrang lo lut te zirchiang turin Kolasib SP kaihhruaina hnuai ah Traffic Management Sub-Committee din nghal a ni.

Vawiin thutkhawmna ah hian Sr. EE, PWD, Sr. EE, PHED, DLAO, SDO(S), District Information & Public Relations Officer, District Urban Development Officer, District Transport Officer, Chairman, Kolasib Town Jt. VC, President, ZDU Kolasib, Sub-Headquarters YMA leh Diakkawn khawtlang hruaitute an tel a ni.