1189/2023-2024

Khawzawl, 19th July 2023: Mizoram Chief Electoral Officer (CEO) Pu Madhup Vyas chuan vawiin khan Khawzawl a tlawh a. MLA Inthlanpui neih tura Khawzawl District inpuahchahna hrang hrang te enfiahin, official te nen inkawmna hun tha tak an hmang bawk.

Khawzawl DC Conference Hall-a official te a kawmnaah CEO Pu Madhup Vyas chuan inthlan tluang taka neih a nih theih nan thawhhona tha a pawimawh thu a sawi a. Midang tihsual atanga inzirin, an tihdan tha entawn a tul, a ti a. Election Commission of India (ECI) in inkaihhruaina a siam te tha taka zawm tur leh mawhphurhna hlenchhuah kawngah inrinthulna a awm loh nan ruahmanna tha tak siam turin official te chu a chah a ni.

Pu Madhup Vyas chuan kum 2018 MLA General Election-ah 22 Tuichang (ST) Assembly Constituency-a vote tla chu Mizoram puma vote tla chawhrual (state average) aia a tlem thu tarlangin, kumin inthlanpui ah chuan vote tla a tam theih nan uar zawka inzirtirna kalpui a, a bik takin a vawi khatna atana vote thlak tur (first time voters) te ngaihpawimawh a tul thu a sawi a. Vote thlak an tam theih nana Khawzawl District-in SVEEP Plan tha tak an nei chu fakawm a tih thu a sawi bawk a ni.

Khawzawl Bawrhsap, District Election Officer ni bawk Pu K. Lalrohlua chuan he hunah hian inlawmna thu a sawi a. Election Officer Pu Timothy R. Lalhmangaiha chuan presentation pein, inthlanpui hmachhawn tura hmalakna leh ruahmanna awm te inhrilhfiahna hun a hmang.

Inkawmna hun hman zawh hian Chief Electoral Officer Pu Madhup Vyas chuan Khawzawl DC Office sak mek tlawhin, Electronic Voting Machine khawl dahna Strong Room, Vote chhiarna tur Counting Centre leh inthlanna kaihhnawiha mamawh tur hrang hranga ruahmanna kalpuite a enfiah a. He mi zawh hian 22/5 Khawzawl Zaingen tana Polling Station-a hman tur Govt. Primary School – I, 22/7 Khawzawl Zuchhip tana Polling Station-a hman tur Govt. High School Zuchhip leh 22/8 Khawzawl Dinthar tana Polling Station-a hman tur Govt. Little Flower School te a tlawh a. Danin a phut tui, inthiarna, power supply, ramp leh tul dang ‘Assured Minimum Facilities’ te a awm tha em tih a enfiah a ni.