Mizoram Chief Electoral Officer Pu Ashish Kundra, IAS chuan vawiin khan a pisa ah Political Party hrang hrang aiawhte kawmin Mizorama Lok Sabha MP thlanna leh Aizawl West-I Assembly Constituency by-election neih hun tur leh hemi atana political party te lo inbuatsaih dan tur te a hrilhfiah.

Pu Ashish Kundra chuan nimin tlai dar 5:00 a Chief Election Commissioner in Lok Sabha MP inthlan hun tur a puan atang khan Model Code of Conduct hi hman tan nghal ani a ti a, Mizoramah chuan Lok Sabha MP thlan leh Aizawl West-I AC by-election te hi a ruala neih tur a nih avangin notification tihchhuah hun, nomination file hun leh inthlan ni te a rualin tih vek anih tur thu a sawi a, March ni 18, 2019 (Thawhtanni) ah inthlan anih tur thu notification tihchhuah ani ang a, notification chhuah anih veleh inthlan chuh tum ten nimonation an file thei nghal ang a, nomination hi March ni 25, 2019 (Thawhtanni) thlengin file theih ani ang. March ni 26, 2019 (Thawhlehni) ah nomination te endik ani ang a, candidate ten an duh chuan March ni 28, 2019 (Ningani) thleng an nomination file tawh chu an hnukkir thei ang. April ni 11, 2019 (Ningani) ah inthlan a ni ang a, May ni 23, 2019 (Ningani) ah vote chhiar ani ang.

Chief Electoral Officer chuan model code of conduct chungchang sawifiahin party tin te chu bawhchhe lo tura fimkhur turin a chah a, nomination file na tur Form-26 chu ECI in an siam danglam hret avangin uluk leh fimkhur taka fill up a tul thu sawiin, Form-26 hi fill up kimloh anih chuan nomination hi hnawl anih mai dawn avangin hemi atana kaihhruaina dan siam te uluk taka chhiar chiang hmasa turin a chah a ni. Polling station awm zawng zawng zinga za a sawm (10%) chu hmeichhe pual bik polling station atana ruahman anih tur thu sawiin First Randomisation of EVM hi inthlanni hma ni 21 ah neih tur ani a ti a, EVM endikna ah political party te chu kal kim ngei ngei thin se a duh thu a sawi bawk. Lok Sabha MP election leh Aizawl West-I AC by-election atan Returning Officer hran ruat an ni a, Lok Sabha MP Election Returning Officer atan Aizawl Bawrhsap Pu Vanlalngaihsaka, IAS ruat niin Aizawl West-I AC by-election Returning Officer tur pawh tihfel thuai anih tur thu a sawi. Hei bakah hian inthlan campaign chhunga political advertisement chungchang te leh media kaihhnawih thil pawimawhte inhrilhfiah ani bawk. Inthlan leh a kaihhnawih chungchang hrechiang duh tan CEO website Ceo.mizoram.gov.in siam a ni a, electoral roll thar ber bakah voter te tana hriattur pawimawh chi hrang hrang te leh thil pawimawh tam tak en theihin a awm a ni.

Vawiin thutkhawmah hian Mizorama Political Party hrang hrang zingah MNF, MPCC, BJP, ZNP, MPC leh PRISM aiawhte an tel a, Chief Electoral Officer hi Pu H.Lianzela, MCS, Jt.CEO leh Pu Andrew H Lalremruata, MIS, Media Nodal Officer ten an tawiawm a ni.