Pu Ashish Kundra, Chief Electoral Officer, Mizoram chuan kan hma lawk April ni 11, 2019 (Ningani) a Parliament a Mizoram aiawhtur thlanna, Lok Sabha Election leh Aizawl West-I Assembly bye-election neih turah inthlanna felfai leh muanawm kan neih theih nan, Mizoram chhunga Electoral Roll a chuang vote nei zawng zawng  te thawhpuiah a sawm a, heng a hnuaia tarlan hrang hrangte hi ngaipawimawh a zawm tum theuh turin ngenna a siam nghal bawk a ni :

1.     Inthlanni-ah vote thlak turin thawk chhuak theuh ila, chawhnu tlai tawh taka chhuah chauh ai chuan chawhma hun thawl a vote thlak mai hi a samkhai a ni.

2.     Inthlan kaihhnawiha mawhphurhna nei reng rengin mahni mawhphurhna ngaipawimawh tur leh hlen chhuak theuh turin kan inchah a ni.

3.     Zu in mi kan zingah an awm fo; inthlan hi a pawimawh em avangin inthlan buaipuitu official te zingah duty neih lai chuan zu in loh tawp tur a ni.

4.     Inthlanna atan hian khawl (EVM leh VVPAT) hman a ni a. Vote thi emaw, vote thlaksual emaw a awmloh nan a hmehna lai tur te hriatchian lo tum tur a ni a. Election Department leh Branch a thawkte engtiklai pawhin zawhchian theih reng a ni.

5.     Inthlan tikhaihlak thei thil engpawh lakah inthiarfihlim theuh tum ila, chutiang thil ti emaw tih tum emaw kan hriat pawhin thawhpui lo ila, thuneitute hnenah hriattir mai zawk tur a ni ang. Inthlanna a vote thlak hi kan chanvo diktak, tumahin min chhuhsak theih loh ani tih i hre thar leh ang u.

6.     MP inthlanaah hian vote tla zat hi MLA inthlan aiin a tlem fo thin a. Tun tum chu tunhma MP inthlanna a vote tla aia tam a tlak theih nan vote nei zawng zawng i thawk chhuak ila, bung thar kai turin i thawk tlang ang u.