2542/2023-2024

Aizawl, the 30th October, 2023: Chief Electoral Officer (CEO) Pu Madhup Vyas, IAS chuan vawiin chawhma dar 11 khan General Election to Mizoram Legislative Assembly, 2023 atana SVEEP State Icon-te a Pisa-ah a kawm.

CEO Pu Madhup Vyas chuan SVEEP State Icon-te chu inthlan kaihhnawih hriattur pawimawhte leh vote thlak tura khua leh tuite zirtir leh hrilhhriat kawnga mawhphurhna hlen tura beisei an nih thu a sawi a. Mizoram chu ziak leh chhiar thiam tamna leh Civil society chak tak awmna State a nih thu sawiin, kan zavaia tanrualna hmangin vote tlak thatna ber State kan siam thei a ni, a ti a. Electoral Roll-ah thalai vote nei thar 50,751 an inziahluh thu sawiin, thalaite'n vote thlak an ngaihpawimawh ngei theih nana tanlak a tul thu a sawi a. Kalkhawmte chu CEO Office nena thawkho an nih tawh thu hrilhin, mawhphurhnate nuam ti taka hlen turin a chah a ni.

Vawiin CEO hova meeting-ah hian vote thlak tam lam voter turnout tisang tura hmalakho dan turte sawiho niin, inthlan hmasa lama vote tlak dante bihchian niin a aia tam vote a tlak theih nana tanlak tlan a tul thu tarlan a ni a. Media platform hrang hrang hman tangkai a tul thu leh mipuite zirtirna thahnemngai taka kalpui a pawimawh zual thu tarlan a ni bawk a. Heng bakah hian Media Cell, CEO Office leh State Level MCMC kaltlanga hmalak dante ngaihthlak a ni bawk.

He hunah hian Addl. CEO Pu H.Lianzela, Chairman, Media Cell, CEO Office, Deputy CEO Pu Henry C.Lalrawnkima, Member Secretary, Media Cell-a thawktute bakah SVEEP State Icon zingah Pu S.Malsawmtluanga (Mama, Footballer), D.J. Lalvenhimi (Dj-i, Singer), Teresa Rodingliani (Tess Pachuau, IG Personality), Zorinsanga Sailo (Zorina, Singer) leh Angelina VL Hriatpuii (Angelina Paul, Media Personality) te an tel a ni.

Heng bakah hian State SVEEP Icon zingah hian Zothankimi (Kimkimi, Model), VL Hmangaihdawngkima (Kimkima, Singer), Zorinpuii Hlawndo (Tetei, ZONET TV Anchor) leh Pu Lalbuatsaiha (Asst. Prof., Govt. J.Thankima College, State PwD Icon) te an tel a ni.