Vawiin khan Chief Minister Pu Lal Thanhawla chu Border Roads Organization (BRO) hnuaia Aizawla hmunpui nei Project Pushpak Chief Engineer Pu KK Razdan chuan hmuin Mizorama BRO hmalakna leh an hma lak zel tumna te a hrilh.

Project Pushpak Chief Engineer Pu Razdan chuan Mizoram hmun hrang hranga BRO in kawng an enkawl mek te hrilhin Buichali-Lengpui; Lawngtlai-Diltlang-Parva; Dungtlang-Vaphai-Farkawn; N.Vanlaiphai-Thingse; Zawngling-Mawhre-Chapui leh Thingsai-Bualpui-Saisih-Pangkhua-Sangau kawng dinhmun leh an hmalak mekna te a hrilh a, heng kawng thenkhata Land Acquisition lamah harsatna an tawh mek thu pawh an sawilang a. Ministry of Surface Transport in tunhma ngaihtuahin kawng enkawlna atan sum an pek tlem tawh thusawiin hei hian kawng enkawlna zuina leh thuamthatna kawnga harsatna lian tak a thlen mek thu te a sawi.

Buichali-Lengpui kawng thuamthat nan hian cheng vaibelchhe 9 proposal BRO hian Ministry lamah an thehlut a, Ministry in a pawm an beisei tih an sawi.