Right to Information Week (5h October – 12th October) 2015 neih mek denchhenin vawiin chawhma khan Chief Information Commissioner Pu Lal Dingliana, IFS (Rtd.) hovin hun hman a ni a. Chief Information Commissioner hi Pu R. Vanlalduha, Dy. Secretary, Mizoram Information Commission chuan a tawiawm a. Vawiin hun, Govt. Champhai College-a buatsaih hi Champhai Addl. DC Pu C. Lalzarliana chuan a kaihruai a ni.

Right To Information (RTI) Act 2005 hi sorkar langtlang, tha leh felfai neih nan leh, eiruk venna atan te, India khua leh tui tupawhin sorkar thathawh dan leh kalphung an hriat theihna, sorkar document kan hriat duhte awlsam taka hriat theihna tura duan chhuah a nih thu sawiin, RTI Act hian sorkar inrelbawlna a nghawng thui hle a ni, a ti a. RTI Act hnuaia chuan sorkarin zep ruk a neih chu tihbo a ni a, thil engkim deuhthaw chu vantlang hriat tura chhawp chhuah a ni zel tawh a ni, a ti a ni.

Chief Information Commissioner chuan RTI Act hman tangkai kawngah Mizoram hian state dang kan la pha thei meuh lova, thenkhat chuan he dan hi vengte hekna lam kawk deuha ngaihna leh, kan culture leh Kristianna nen inmil lo deuha ngaihna kan neih vang te ani, a ti a. Mahse chutiang lampanga ngaih tur a nih loh thu leh, thenawm khawveng inhmuh mawhna leh, dik lo taka kan inrinhlelhnate thudik hmanga tihbona tur zawk a nih thu a sawi a. Sorkar leh sorkar atanga tanpuina dawng NGO te pawh an hnathawh dan, project an siam dan leh pawisa an hman danah te, an hlawhtlin danahte thil tha, entawn tlak leh tangkai tak tak hriat theihna a ni ve bawk a. Kan rama thil kal dik lo tam tak siamthat nan he dan hi kan uar a, Awareness Campaign pawh ngawrh lehzual a tul hle a ni, tih sawiin, he dan hi eiruk dona hriamhrei ai mahin eiru tur venna a ni, a ti.

RTI Week puala hun buatsaihah hian Champhai DIPRO Pi Emily Lalrinpuii chuan Key note address a pe a. He hun chhim tura kal zawng zawng ten RTI Act chungchangah hriat chian leh hriat belh duh an neihte zawhna leh sawihona hun siam a ni a. Hun hi Pu Lalnunmawia, Principal, Govt. Champhai College chuan lawmthu sawiin a khar a ni.

Vawiin ‘RTI Week 2015’ puala inkhawm hi Mizoram Information Commission, I&PR Department leh Champhai DC Office tang hova buatsaih a ni a. Champhai Town area chhunga Sorkar Office hrang hranga thawkte, a bik takin SPIO, SAPIO leh DAA bakah tlawmngai pawl hrang hrang aiawh te, Village Council aiawhte leh thuthar lakhawmtute an tel a ni.