Serchhip District Bawrhsap Dr. Lalrozama, IAS chuan vawiin chawhnu khan Thenzawl Kanan Venga SDO(Civil) Office sak zawh tawh, la luah theih siloh chu tlawhin a hmuna a enfiah.

Thenzawl SDO(C) Pu K.Lalhmuakliana, MCS in a lo dawng sawng a, Office building sak zawh tawh ni si luah theih loh a a la awm chhan te Bawrhsap hi a lo hrilh a, tun dinhmunah chuan power supply pek an ni tawh a, tui connection an la neih loh pawh Bawrhsap tawiawm tu Er. Lalhruaia, Sr. EE, PHED chuan tui connection dilna an siam chuan pek nghal theih anih thu a sawi a, Office chhunga hmantur bungraw mamawh chi hrang hrang te pawh Bawrhsap chuan thuneitu sang te hnena chak zawka nawr dan ngaihtuahpui a tum thu a sawi bawk a ni.

Bawrhsap chuan SDO(Civil) Office building sak chu tha thawkhata a hriat thu leh contractor pawhin hna tha takin a thawk ni a a hriat thu a sawi a, Office building sak zawh tawh si luah theih loh a a awm reng chuan a building sak zawh sa tawh pawh hian a chhiat phah thuai ang tih a hlauhthawn thu a sawi a, Office Complex ah hian Staff Quarters Type-IV pakhat leh Type-II pakhat sak belh a la ni dawn a, heng staff quarters sakna tur hmun te hi Bawrhsap ho hian en nghal a ni bawk.

Thenzawl SDO(Civil) Office ah hian tun dinhmunah thawktu panga SDO(C) bakah LDC pakhat, Driver pakhat leh IV Grade pahnih an awm a, Tui connection leh office chhung mamawh bungrua te a awm chuan luah luh nghal mai theih anih tawh thu Thenzawl SDO(C) chuan a sawi ani.