Vawiin khan ‘Lunglei District Handloom Fair’ chu Addl DC Pu Rothuama’n Saikuti Hall hnuai ber hmunah a hawng a. October ni 7-10, 2015 chhung neih tur he Fair hi Ministry of Textiles bultum niin Ministry aiawhin Asst. Director Pu S.K. Sen pawh a hawnnaah a lo tel a. He Handloom Fair-ah hian Mizoram hmun hrang hrang atangin handloom leh handicrafts lama eizawngten an dehchhuah thilte Stall 45 laiah an phochhuak.

Fair hawnna inkhawm MAHCO Managing Director Pu Lalrinsanga kaihhruaiah Khuallian Addl DC Pu Rothuama chuan handloom leh handicraft te hi kan Mizo nihna pholanna ber an ni, a ti a. Mi an incheidan atangin an mizia a lang thin an tih angin kan Mizo hnam incheinate hi kan chhuang a ni tih khawvel hmuh thamin i uar zel ang u, a ti bawk. Lunglei District chhungah handloom leh handicraft lama eizawng in-register chu mi 130 vel an nih laiin a tam zawk chu Lunglei khaw pawn lam deuh vek an nih thu tarlangin Addl DC chuan handloom & handicraft lamah Lunglei District-ah tan lak a ngaih hle thu a sawi a. Mahni ramchhung dehchhuak leh kutchhuak thil ngaihhlutna chuan ram a chawikangin a tizahawm thin a, chuvangin inthlahdah lovin tan la sauh sauh turin kalkhawmte a chah.

DIC Lunglei General Manager Pi Lalrodingi pawhin thusawiin khawvel insumdawntawnna ‘dollar map’ ah Mizoram tichuangkai thei tur chu kan Mizo handloom hi a ni a ti a. Mahni kutchhuak ngaisang lo hnam chu a dingchhuak ngai lo tih sawiin Pi Lalrodingi chuan Mizo puan ze hrang hrangte hi humhalh a, a dik tak chauh hmang a, hnam dangte zerang kai lova tah turin a chah bawk. Ram leh hnam dangten a tahna khawl leh hmanrua nei tha zawk mahse Mizote Pathian in talent min pek bik rawng thlak dan leh design thiamnaah hnamdangten min tluk thei lova, chuvangin Mizo kutchhuak hi mit la tak niin khawvel dengchhuak khawpin siam theih a ni, a ti bawk.

Tun tum Handloom Fair-ah Lunglei District atanga rawn inphochhuak thei pakhatmah an awm lo chu pawi a tih thu sawiin Pi Lalrodingi chuan Handloom lamah tan lak nasat a tula a hriat thu a sawi bawk.