4514/2024-2025

Lawngtlai, 3rd March 2025 : Vawiin khan Mizoram Information Commission atanga lokal Pu John Neihalai, Chief Information Commissioner leh Pu H. Dolianbuaia, Secretary (MIC) chuan Lawngtlai District - a State Public Information Officer (SPIO) leh State Assistant Public Information Officer ( SAPIO) te  RTI Act - chungchang zirtirna  an neihpui.

Pu John Neihlaia chuan mi thahnemngaite thawhrimna zarah RTI Act chu ni 12, October, 2005 atang khan India ramah hman tan niin, Mizoramah chuan  RTI Act kalpui turin June  2006 khan Mizoram Information Commission din a nih thu a sawi a.  Dan tha tak siam tura theihtawp chhuahtute an fak awm takzet a ni tiin, RTI Act chu  ngaihlu leh ngaipawimawh turin kalkhawmte a chah a.  Khawvel ram hrang hrnagin langtlang sawrkar siam turin dan tha tak tak an nei a, India ramah pawh RTI Act hi langtlang sawrkar siamna tura duan a nih angin, Mizoram mipuite pawhin  an hmang tangkai hle tih a tarlang.

RTI Act hlawhtling taka kalpui turin SPIO leh SAPIO ten mawhphurhna sang tak an nei tih tarlangin, Chief Information Commissioner chuan langtlang sawrkar siam tura theihtawp chhuah fo thin turin a chah a. Mipuiten zawhna an neih ang angte a hun taka chhang tura SPIO leh SAPIO te in ring reng tura chahin Pu John Neihlaia chuan hremna awmlo zawnga hnathawk turin a ngen a ni. SPIO leh SAPIO- te chu an mawhphurhna leh hremna awm ang angte chiang taka hre tur a chahin, a bik takin SAPIO ten zawhna an dawngthei a, chhanna erawh SPIO te pek tur tih chu vawng reng turin a chah.

Pu John Neihlaia chuan Mizoramah  RTI Online- a kalpui a nih atangin, zawhna a lut  tam em em a, kumin bikah pawh  zawhna - 1107 lai a lut tawh tih a tarlang a. Zawhna a tam zel avaning SPIO leh SAPIO ten theithawp chhuah zel a tul a ni, a ti.  Pu John Neihlaia chuan data an neih angin,  tun dinhmunah SPIO leh SAPIO-te an thawk tha hle tih a tarlang a, hmalam hunah pawh theihtawp chhuah zel turin a sawm nghal bawk.

Pu H. Dolianbuaia, Secretary (MIC) chuan RTI Act 2005 chungchangah zirtirna hun a hmang a, zawhna leh chhanna hun hman nghal a ni.

Vawiin hun hmannaah hian Pu  Zoramsiama Hmar, Addl. DC chuan kalkhawmte lawmna thu sawiin, Mizoram sawrkar leh LADC a SPIO leh SAPIO te an tel kim tha hle a, Pu H. Dolianbuaia, Secretary, MIC  chuan lawmthu sawina neiin hun a khar.