Chief Justice Guwahati High Court, Justice M.B Lokur chuan nimin khan Mamit khua lo thlengin vawiin khan Mamit a court hmun hma tur Building sak mek, Rs 95,33,120.00/- ( Building Estimate) leh Quarter hmunhma turte a hmunah kalin a en a, Building sak mek chu a duh aia a tet thu sawiin, officials lam te chuan tuna Court Building hi High Court-in Standard Size tur a tih chhuah hma a lo duan tawh anih thu an sawi fiah a ni.

Chief Justice chuan Judicial Quarter hmun tur chu a duhthusam anih loh thu sawiin a theih chuan hmun dang zawn ni thei se a tih thu a sawi bawk a ni. Chief Justice chuan Joint Village Council Court tlawh bawkin Village Level-a Court kan neih hi tha leh zuala an thuneihna hmanga thubuai an remna kawngah hmasawn a tul thu uar takin a sawi bawk. India ramah thubuai chinfel loh tam tak a awm thusawiin Village Court te an thawh that chuan hetiang thubuai tam tak te hi chinfel theih a nih a rin thu a sawi bawk.

Chief Justice hi Pu R.Thanga Register Guwahati High Court, Mizoram Bench leh Officials te bakah Mamit atangin Pu Rodney L. Ralte IAS, Thomas Lalrammawia Civil Judge cum Judicial Magistrate 1st Class te leh Police hotuten an tawiawm a ni.

Tunah hian Mamit-ah Judicial Officer-1, leh LDC-3 leh Gr-IV-2 awmin District Legal Services Authority hnuaiah UDC-1, LDC-1 leh Gr-IV-1 an awm bawk a ni.